मुंबईः रायगड जिल्ह्यातल्या इर्शाळवाडीत बुधवारच्या रात्री कोसळलेल्या दरडीमुळे आतापर्यंत २२ जणांचा मृत्यू झाला असून शंभरपेक्षा जास्त जणांचा शोध सुरु आहे. आजची शोधमोहीम थांबवण्यात आलेली आहे. उद्या पहाटे पुन्हा काम सुरु होणार आहे.

उद्धव ठाकरेंच्या उपस्थितीत ठाण्यात उद्या संध्याकाळी होणारा ठाकरे गटाचा मेळावा रद्द करण्यात आलेला आहे. पाऊस आणि इर्शाळगड दुर्घटनेच्या पार्श्वभूमीवर मेळावा रद्द करण्यात आल्याची माहिती मिळतेय.

उद्धव ठाकरे हे उद्या इर्शाळवाडीच्या दौऱ्यावर जाणार असल्याची सूत्रांची माहिती आहे. घटनेच्या दिवशी आदित्य ठाकरे यांनी घटनास्थळी भेट देवून दुर्घटनाग्रस्तांना धीर दिला होता. शिवाय विधान परिषदेचे विरोधी पक्षनेते अंबादास दानवे यांनीही इर्शाळवाडीला भेट दिली होती.

दरम्यान, उद्या उद्धव ठाकरे इर्शाळवाडीला भेट देणार असून पीडित कुटुंबांशी ते संवाद साधणार आहेत. संपूर्ण गावावर दुःखाचा डोंगर कोसळला आहे. या घटनेनंतर मुख्यमंत्री एकनाथ शिंदे यांनी गावचं कायमस्वरुपी पुनर्वसन करण्याची घोषणा केली आहे.

स्थानिक माहितीवरून सदरील आदिवासी वाडीमध्ये एकूण ४८ कुटुंब वास्तव्यास असून लोकसंख्या २२८ इतकी आहे. त्यातील सुमारे १७ ते १८ घरांवर दरड कोसळी आहे. बचाव कार्यात शंभरपेक्षा जास्त व्यक्तींना सुरक्षित वाचविण्यास यश आले आहे.

२२८ पैकी उर्वरित १०९ व्यक्तीचा शोध घेण्याचे काम सुरु आहे. इर्शाळवाडी हे ठिकाण भारतीय भूवैज्ञानिक सर्वेक्षण (GSI) विभागाच्या अहवालानुसार संभाव्य दरडग्रस्त ठिकाणाच्या यादीत समाविष्ट करण्यात आलेले नव्हते. त्यानंतर आता अशा संभाव्य गावांचा सर्व्हे करण्याचे आदेश देण्यात आलेले आहेत.