छत्रपती संभाजी नगरः अंतरवाली सराटी इथं झालेल्या लाठीहल्ला प्रकरणात तीन जणांना पोलिसांनी अटक केली आहे. यातील ऋषीकेश बेदरे याच्याकडे पोलिसांना पिस्तुल सापडले होते. शिंदे गटाचे नेते संजय शिरसाट यांनी या प्रकरणी उद्धव ठाकरे गट आणि शरद पवार गटावर दंगलीचे आरोप केले आहेत.

छत्रपती संभाजी नगर येथे आयोजित पत्रकार परिषदेमध्ये बोलताना संजय शिरसाट म्हणाले की, अंतरवाली येथे झालेल्या घटनेनंतर राज्यात पडसाद पडलेले पाहायला मिळाले. मुळात जालन्यात दंगल कशी घडेल, यासाठी काही बडे नेते प्लॅन बनवत होते.. बनवलेला प्लॅन अमलात आणला, घटनाक्रम पाहिला तर लक्षात येईल. कुणाच्या मृत्यूनंतरही कधीच न जाणारे बडे नेते हे तातडीने गेले होते.

शिरसाट पुढे म्हणाले, दंगल घडवणाऱ्यांवर आता कारवाई केली जाणार आहे. राज्यात दंगली घडवून सरकार कसे बदनाम होईल हा प्रयत्न केला गेला. सरकारला विनंती आहे, की मुख्य सूत्रधार शोधले पाहिजेत, पिस्टल मिळालेला आरोपी आहे का मोहरा आहे, हे शोधलं पाहिजे.

शिरसाट पुढे बोलले, ज्यांच्याकडे पिस्टल आढळली त्याला सुपारी देण्यात आली होती. मराठा आमदार सोळंके हे मराठा असूनही त्यांचा घर कुणी जाळलं? दंगलीसंदर्भात आपण अधिवेशनात आवाज उठवणार असून सगळे पुरावे मांडणार, सगळे व्हिडीओ आणि फोटो आले आहेत. रोहित पवार काय म्हणतात हे चौकशीत समोर येईल, त्या भागात कोण बैठक घेत होते हे समोर येईल. स्वतः करायचं आणि नामंनिराळं व्हायचं, असा आरोप त्यांनी केला.

दंगलीमागे संजय राऊत, राष्ट्रवादीचे युवा नेते आणि माजी मंत्री आहेत का? हे तपासामध्ये उघड होईल. शरद पवार गट आणि उद्धव ठाकरे गटाच्या नेत्यांवर दंगलीचे आरोप यावेळी शिरसाट यांनी केले आहेत.