जालनाः शुक्रवारी जालन्याच्या आंतरवाली गावात झालेल्या लाठीहल्ल्यामुळे पोलिसांवर संताप व्यक्त होत आहे. या घटनेमध्ये अनेक आंदोलक आणि पोलिसदेखील जखमी झालेले आहेत. सरकारने कारवाई करत पोलिस अधीक्षक तुषार दोशींना आज सक्तीच्या रजेवर पाठवलं होतं.

तुषार दोषींच्या जागेवर नवीन आयपीएस अधिकाऱ्याची नियुक्ती करण्यात आलेली आहे. आयपीएस शैलेश बलकवडे हे जालना जिल्ह्याचे पोलिस अधीक्षक असतली. जालन्यातील मराठा आंदोलनामुळे राज्यभर वातावरण पेटलेलं आहे. त्यामुळे जालन्यात शांतता ठेवण्याचे प्रमुख आव्हान सरकारसमोर आहे.

त्यामळे तुषार दोशींच्या जागी शैलेश बलकवडे यांची पोलिस विभागाने वर्णी लावली आहे. दरम्यान, उपमुख्यमंत्री देवेंद्र फडणवीस यांनी आंदोलकांशी फोनवरुन चर्चा केलीय. मराठा आरक्षणप्रश्नी आपण तोडगा काढू, शांततेच्या मार्गाने आंदोलन करा, असं आवाहन फडणवीसांनी मनोज जरांगेंना केल्याची माहिती आहे. 'एबीपी माझा'ने हे वृत्त दिलेय.

दरम्यान, सरकारचं एक शिष्टमंडळ मराठा आंदोलकांच्या भेटीसाठी जालन्याच्या आंतरवालीमध्ये दाखल झालेलं होतं. त्यांनीच गृहमंत्री देवेंद्र फडणवीसांचं आंदोलकांशी बोलणं करुन दिलं. त्यामुळे मराठा आंदोलनाची पुढची दिशा काय असेल, असा प्रश्न उपस्थित होत आहे.