Jayant Patil NCP Sharad Pawar Meeting Maharashtra : राष्ट्रवादीचे प्रदेशाध्यक्ष म्हणून ज्यांनी पदभार स्विकारला त्या जयंत पाटील यांच्यामुळे राज्यातील राजकारण बददलं असे सांगण्यात येत आहे. पाटील यांची राजकीय खेळी याचा परिणाम राष्ट्रवादीतील ज्येष्ठ नेत्यावर झाला आणि त्यांनी वेगळी भूमिका घेण्याचा विचार केला. त्यामागील मुख्य कारण म्हणजे जयंत पाटील असा सूर अजित पवार यांच्या बैठकीतून अनेक आमदारांनी आळवला. यासगळ्यावर पाटील यांनी त्यांची भूमिका मांडली आहे.

जयंत पाटील यांनी यापूर्वी देखील जोपर्यत पवार साहेबांचा पाठींबा आहे तोपर्यत मला कसलीही भीती नाही. माझ्याविषयी कुणी काहीही म्हणेल त्याचा विचार मी करत नाही. मला साहेबांनी जी जबाबदारी दिली ती प्रामाणिकपणे पार पाडण्याचा विचार आहे. त्यामुळे आम्हाला जे सोडून गेले त्यांच्याविरोधात पक्षांर्तगत कायद्यानुसार कारवाई केली जाणार आहे. वेळ पडल्यास कोर्टामध्ये जाणार असल्याचे पाटील यांनी स्पष्ट केले होते.

जयंत पाटील यांनी आजच्या बैठकीमध्ये जी भूमिका मांडली त्यावरुन त्यांच्या मनातील व्यथा समोर आली आहे. पाटील यांनी याअगोदर राष्ट्रवादीतील गटबाजीवर अप्रत्यक्षपणे भाष्य केले होते. पाटील म्हणाले, पहिल्यापासून साहेबांबरोबर आहे. बडवे असा शब्द वापरला जात आहे. खूप वाईट वाटते. मला पाच वर्षे पूर्ण झाली हे मला माहिती आहे तेव्हा आता मला कार्यमुक्त करा असे सांगितले. अशी भावना पाटील यांनी यावेळी व्यक्त केली. यावेळी पाटील यांनी छगन भुजबळ यांच्या आरोपांना जशास तसे उत्तर दिले आहे.

पाटील म्हणाले, तुम्हा सगळ्यांचे खूप खूप आभार. एका फोनवर तुम्ही सगळे आलात. पवार साहेबांच्या शब्दावर तुम्ही आलात. हे महत्वाचे आहे. प्रत्येक कार्यकर्ता हा पवारांच्या प्रेमापोटी आला आहे. आपल्या सगळ्यांना आयुष्यामध्ये वेगवेगळ्या प्रसंगांना सामोरं जावं लागतं. मात्र पवार हे कधीही विचलित झाले नाही. त्यांनी प्रत्येकवेळी बाजू पलटवून टाकली आहे.