मुंबई : राज ठाकरे यांच्या उत्तर सभेनंतर राजकीय पक्षांनी आणि नेत्यांनी एकमेकांवर टीकेची झोड उठवली आहे. आपल्या भाषणादरम्यान बाबासाहेब पुरंदरे यांच्यामुळे शिवाजी महाराज घराघरात पोहोचले असं वक्तव्य राज यांनी केलं होत. त्यानंतर सोशल मिडीयावर आणि राजकारणातून त्यांच्यावर टीका होत होती. त्यानंतर आता राष्ट्रवादीचे नेते जितेंद्र आव्हाड यांनी बाबासाहेब पुरंदरे यांच्या 'राजा शिवछत्रपती' या शिवाजी महाराजांवरील कांदबरीतील संदर्भ देत टीका केली आहे.

दरम्यान आव्हाडांनी राजा शिवछत्रपती कादंबरीतील संदर्भ ट्वीट करत हे आम्ही सहन करणार नाही असं सांगितलं. त्यांनी या कादंबरीतील पान नं. १२६ वर लिहिलेल्या प्रकरणावरील स्पष्टीकरण देणारे संदर्भ दिले आहेत. हा फोटो ट्वीट करताना ते म्हणतात की, शिवाजी महाराज, जिजाऊ मॉंसाहेब आणि दादोजी कोंडदेव ह्यांचे गोत्र एक होते... कादंबरीकार बाबासाहेब पुरंदरे यांनी हे लिहिले आहे. असं म्हणत त्यांनी गोत्र एक कुणाचे असते? यावरही प्रश्नचिन्ह उपस्थित केलं आहे. ते पुढे म्हणतात की आम्ही विरोध केला तर आम्ही जातीयवादी...आम्ही मेलो तरी हे सहन करणार नाही. असं त्यांनी आपल्या ट्वीटमध्ये म्हटलं आहे.

दरम्यान संदर्भ दिलेल्या या प्रकरणात दादोजी कोंडदेव यांचे शहाजी महाराज, मॉंसाहेब जिजाऊ, शिवाजी महाराज आणि त्यांच्या कुटुंबाशी असलेल्या संबंधावर भाष्य केलेलं आहे. पंत हे भोसल्यांच्या घरात मायेचे, ममतेचे आणि धाकाचे, दराऱ्याचे वडीलधारी पुरुष होते असं यामध्ये लिहीलेलं आहे. तसंच शहाजी महाराज आणि त्यांचा राजकारणातील स्वभाव सारखाचं होता, तसंच शिवबांचं, आईसाहेबांचं आणि दादोजी कोंडदेव यांचं गोत्र एकच होतं असंही यात लिहिलेलं आहे.