मुंबई : भाजपने कर्नाटकातील राजीनामासत्रासंदर्भातील घडामोडींबद्दल मौन बाळगले असले तरी गेले काही दिवस या मोहिमेला मुंबईतून बळ मिळाले. गेले सात ते आठ महिने बंडखोर कन्नड आमदारांचे आदरातिथ्य भाजपत नव्याने प्रवेश केलेला एक नगरसेवक युवा पदाधिकाऱ्याच्या मदतीने करत असे.

कॉंग्रेसनेही या घडामोडींवर लक्ष ठेवले होते. मुंबईतील एका पंचतारांकित हॉटेलात या आमदारांच्या येण्याजाण्यावर कॉंग्रेस लक्ष ठेवून असे. मुंबईचे माजी अध्यक्ष संजय निरुपम यांनी सर्वप्रथम कर्नाटकातील काही आमदार भाजपकडे जात असून ते मुंबईत मुक्‍कामाला असल्याची माहिती दिल्लीतील श्रेष्ठींना पाठवली होती. या टिपऑफनुसार कर्नाटकातील संकटमोचक शिवकुमार यांनी काम सुरू करून जेडीएस-कॉंग्रेस संयुक्‍त सरकारला तारले होते.

आज बाहेर पडलेल्या आमदारांशी भाजपने मुंबई मुक्‍कामात संपर्क साधला होता, असे आता स्पष्ट झाले. मात्र अर्थातच आज भाजपने त्याबाबत मौन बाळगले आहे.