मुंबई - देशात विरोधकांची इंडिया आघाडी तयार झाली आहे. या आघाडीत उद्धव ठाकरे गटाची शिवसेना सामील झाली असून मुंबईत याच महिन्यात इंडिया आघाडीची बैठक आयोजित कऱण्यात आली आहे. त्यातच उद्धव ठाकरे गटाचे खासदार अरविंद सावंत यांनी केंद्रातील मोदी सरकारवर टीका केली. तसेच शरद पवार आणि अजित पवार यांच्यातील भेटीवर भाष्य केलं.

मोदींनी स्वातंत्र्य दिनी केलेलं भाषण पंतप्रधान म्हणून केले की भाजपचे नेते म्हणून केलं ? असा प्रश्न उपस्थित करत सावंत म्हणाले की, येणाऱ्या निवडणुकीसाठी मोदी यांचं कालचं भाषण होत. त्यांना कळलं की इंडिया आघाडी आता त्यांना मोठं आव्हान देणार आहे. महाराष्ट्र सदनमधील बैठकीतच त्यांनी सांगितलं होतं की, भाजपने नाही शिवसेनेने युती तोडली. सावंत पुढं म्हणाले की, मोदींचं शिवसेनेकडे सगळ्यात जास्त लक्ष आहे. शिवसेना कोणाची असेल तर ती उद्धव ठाकरेंची आहे हे पंतप्रधान मोदींना सुद्धा कळलं आहे.

महापालिका निवडणुका अजूनही होत नाहीये, याचा अर्थ लोकशाही नाहीये. महापालिका निवडणूक होणार नाही, आता लोकसभा निवडणुका होतील, त्यामुळे तशा प्रकारे लोकसभा निवडणुकांचा आढावा घेतला जात असल्याचंही सावंत यांनी सांगितलं.

शरद पवार-अजित पवार भेटीवर सावंत म्हणाले की, संभ्रम निर्माण केला आहे. ज्यांनी तो निर्माण केला, त्यांनी त्यांचं निवारण करायला पाहिजे. महाभारताच्या युद्धात कौरव आणि पांडव भाऊ-भाऊ होते. मात्र धर्मअधर्माचा निर्णय घेता आला पाहिजे, असंही सावंत म्हणाले.

दुसरीकडे शरद पवार यांनी आपण इंडिया आघाडीत असल्याचं आज स्पष्ट केलं आहे. तसेच भाजप समाजात तेढ निर्माण करत असल्याचा आरोपही त्यांनी केला.