सोलापूरः बीआरएस पक्षाचे प्रमुख के. चंद्रशेखर राव हे दोन दिवसीय महाराष्ट्राच्या दौऱ्यावर आहेत. आषाढी वारीनिमित्त असलेल्या दौऱ्यासाठी केसीआर तेलंगणातून ६०० गाड्यांचा ताफा घेऊन आले आहेत.

मात्र आज धाराशिव येथे केसीआर यांना आणि त्यांच्या पक्षाच्या नेतेमंडळींना खास मटणाचा बेत ठेवण्यात आलेला आहे. धाराशिव येथील मुरुम येथे त्यांच्यासह त्यांचं मंत्रिमंडळ आणि नेतेमंडळी;अशा साधारण दीड हजार जणांसाठी उस्मानाबादी बोकडाच्या मटणाची सोय करण्यात आलेली आहे. याशिवाय आवडीनुसार चिकनदेखील ठेवण्यात आलेले आहे.

उद्या केसीआर हे आपल्या नेत्यांसह पांडुरंगाचं दर्शन घेणार आहेत. हेलिकॉप्टरमधून पुष्पवृष्टी करण्यात येणार होती. मात्र राज्य शासनाने ही परवानगी नाकारली आहे. गुरुवारी एकादशी असूनही आज त्यांनी मटणाचा बेत आखल्याने चर्चा होऊ लागल्या आहेत.

राष्ट्रवादी काँग्रेसचे आमदार अमोल मिटकरी यांनी ट्वीट करुन बॅनरवर पांडूरंगाचे फोटो आणि पैशाच्या जोरावर ठिकठिकाणी मटणाचा बेत, असं म्हणत पंढरीची वारी पवित्र आहे ती अपवित्र करु नका, असं आवाहन केलंय.

दरम्यान, सहाशे गाड्यांचा ताफा घेऊन केसीआर हे सोलापुरात दाखल झालेले आहेत. आज दिवसभर ते धाराशिव येथे असून उद्या पंढरपुरात पांडुरंगाचं दर्शन घेतील. त्यानंतर ते तुळजापूर येथेही तुळजाभवानी देवीचं दर्शन घेतील. आज त्यांचा सोलापुरात मुक्काम आहे.