पुणे - कोरेगाव भीमा येथे झालेल्या दंगलीच्या तपासासाठी नेमलेल्या आयोगाने राष्ट्रवादी काँग्रेसचे संस्थापक अध्यक्ष शरद पवार यांना आयोगासमोर साक्ष देण्यासाठी चार एप्रिल रोजी उपस्थित राहण्यास एका नोटिशीद्वारे सांगितले आहे. तसेच या तारखेत बदल होणार नाही, अथवा पुढची तारीख मिळणार नसल्याचेही नमूद केले आहे.

- आता बातम्या ऐकण्यासाठी डाऊनलोड करा ई-सकाळचे ऍप 

पुण्यात झालेल्या एल्गार परिषदेनंतर कोरेगाव भीमा येथे दंगल उसळली होती. त्याचे पडसाद संपूर्ण महाराष्ट्रात उमटले होते. पुण्यातील विश्रामबाग पोलिस ठाण्यामध्ये याप्रकरणी गुन्हा दाखल आहे. त्यात नऊ जण सध्या अटकेत आहेत. पवार यांनी या गुन्ह्याची पुन्हा एकदा चौकशी करावी, अशी मागणी केली होती. त्यानंतर केंद्र सरकारने हा गुन्हा तपासासाठी ‘एनआयए’कडे सोपवला होता. या निर्णयामुळे राजकीय क्षेत्रात मोठा वाद निर्माण झाला होता. त्यानंतर कोरेगाव भीमा चौकशी आयोगाने पवार यांना चौकशीसाठी बोलवावे, अशी मागणी केली होती. त्यानंतर आयोगाने पवार यांना हजर राहण्याची नोटीस बजावली आहे. 

कोरेगाव भीमा येथे झालेल्या दंगलीनंतर पवार यांनी आयोगासमोर एक प्रतिज्ञापत्र सादर केले होते. त्यात त्यांनी कुणाला जबाबदार धरले नव्हते. मात्र गेल्या काही महिन्यांपूर्वी पवार यांनी काही विधाने, आरोप केले आहेत. यामुळे कोरेगाव भीमातील दंगलीबाबत पवारांकडे सांगण्यासारखी माहिती असेल, किंवा पुरावे असतील तर त्यांनी ते सांगितल्यास रेकॉर्डवर येण्यास मदत होईल. म्हणून पवार यांनी आयोगापुढे उपस्थित राहावे, अशी मागणी केली होती. आता पवारांकडे जी माहिती असेल ती रेकॉर्डवर येईल, यासाठी आयोगाने घेतलेल्या निर्णयाचे स्वागत आहे, असे याचिकाकर्ते ॲड. प्रदीप गावडे यांनी म्हटले आहे.