मराठी मनोरंजन विश्वामध्ये नेहमीच आपल्या परखड आणि आक्रमक स्वभावामुळे आणि वादग्रस्त वक्तव्यामुळे चर्चेत असणारी केतकी चितळे ही नेहमीच तिच्या वक्तव्यामुळे वादाच्या भोवऱ्यात सापडते. राष्ट्रवादी कॉंग्रेस पक्षाचे अध्यक्ष शरद पवार यांच्याबाबत आक्षेपार्ह वक्तव्य केल्यामुळे बराच वाद निर्माण झाला होता. त्यामुळे तिला तुरुंगातही जावे लागले होतं. मात्र तरीही ती आपलं मत मांडत असते.

दरम्यान गेल्या काही दिवसांपासून पुन्हा एकदा केतकी चितळे वादाच्या भोवऱ्यात सापडली आहे. नवीन वर्षाच्या शुभेच्छा देण्यासाठी केतकीने सेलिब्रेशनचा एक व्हिडीओ सोशल मीडियावर पोस्ट केला होता. कोरेगाव-भीमा येथील ऐतिहासिक लढाईची आठवण म्हणून साजरा करण्यात येणाऱ्या शौर्यदिनाच्या निमित्ताने तिने कोरेगाव भीमा येथे शौर्य दिनाबद्दल काहीही पोस्ट न टाकल्यामूळे तिच्यावर टिका करण्यात आली, यावर केतकीने प्रतिक्रिया दिली. त्यामूळं ती पुन्हा एकदा वादाच्या भोवऱ्यात अडकली आहे. तिच्या व्हिडिओला एका नेटकऱ्यानं कमेंट करत लिहिलं होतं की ,“तमाम भारतीयांना भिमा कोरेगाव शौर्य दिनी शुभेच्छा द्याल असे वाटले होते. तुमच्याकडून आजचा दिवस दुर्लक्षित होणे अनपेक्षित आहे”.

या कमेंटवर केतकी भडकली आणि तिने त्या कमेंटवर खोचक प्रतिक्रिया दिली. ती कमेंट करत म्हणाली, “भिमा कोरेगाव म्हणजे तीच जागा जिथे ब्रिटिश सैन्यातील तुकडी पेशव्यांच्या विरोधात लढली?! ब्रिटिश सरकारच्या बाजूने मराठा सैन्याविरुद्ध लढणाऱ्या लोकांना मी शुभेच्छा देण्याची तुम्ही अपेक्षा ठेवता म्हणजे एक तर तुम्हाला मी राष्ट्रद्रोही (धर्मद्रोही) वाटते, किंवा तुम्हाला खरा इतिहास माहिती नाही. यातील नेमके काय?” केतकीच्या या प्रतिक्रियेमुळे तिच्यावर पुन्हा टिका होत आहे.

केतकीच्या या वादग्रस्त पोस्टची सरकारने तत्काळ दखल घ्यावी. तिच्यावर कायदेशीर कारवाई करावी, अशी मागणी रिपब्लिकन पार्टी ऑफ इंडियाचे नेते सचिन खरात यांनी केली आहे. नववर्षानिमित्त तिने सोशल मीडियावर याविषयी भाष्य केलं होतं. सचिन खरात म्हणाले, सतत केतकी चितळे वादग्रस्त पोस्ट करत आहे. भीमा कोरेगाव प्रकरणातील पोस्टची मुख्यमंत्री एकनाथ शिंदे यांनी कायदेशीर दखल घ्यावी आणि तिच्यावर कारवाई करावी, अशी मागणी आम्ही करत आहोत.