मुंबईः येत्या ३१ ऑगस्ट आणि १ सप्टेंबर रोजी मुंबईमध्ये इंडिया आघाडीची बैठक होत आहे. उद्धव ठाकरे आणि महाविकास आघाडी या बैठकीचे यजमान आहेत. ३० तारखेला उद्धव ठाकरे पत्रकार परिषद घेऊन बैठकीविषयी माहिती देतील. त्यापूर्वी संजय राऊत यांनी आज माध्यमांशी संवाद साधला. ३८ देशातील पत्रकार बैठकीसाठी येणार असल्याचं राऊतांनी स्पष्ट केलं.

संजय राऊत म्हणाले की, इंडिया आघाडीच्या बैठकीविषयी देशभरात नाही तर जगभरात चर्चा आहे. जगातून 38 पत्रकार बैठकीसाठी येणार आहेत. त्यांनी नोंदणीसाठी आमच्याकडे विचारणा केली असून त्यांना या बैठकीत उपस्थित राहायचं आहे.

राऊत पुढे म्हणाले की, शिवसेनेने या बैठकीचे यजमानपद स्वीकारलं आहे. 30 तारखेला उद्धव ठाकरे पत्रकार परिषद घेऊन 31 आणि 1 तारखेच्या बैठकीची माहिती देणार आहेत. मुंबईच्या ग्रँड हयात येथे बैठक होत आहे. या बैठकीत इंडिया आघाडीच्या लोगोचं अनावरण केलं जाणार असून लोगोमध्ये देश आणि देशाची एकता असणार आहे. असं राऊतांनी सांगितलं.

कसा असेल लोगो?

हा देश एकत्र राहण्यासाठी, अखंड भारतासाठी जे आवश्यक आहे ते या लोगोमध्ये आहे. नॅशनल अजेंडा... देशाची लोकशाही वाचवण्यासाठी ही आघाडी आहे. नवीन पक्षदेखील आमच्यात सामील होतील, असंही राऊतांनी स्पष्ट केलं. त्यामुळे इंडिया आघाडीचा लोगो कसा असेल हे १ सप्टेंबर रोजी स्पष्ट होईल.