मनसे अध्यक्ष राज ठाकरे (Raj Thackeray) यांनी गुढीपाडवा मेळाव्यात मशिदीवरील भोंगे उतरवण्यासंदर्भात वक्तव्य केलं होतं. यावेळी त्यांनी महाविकास आघाडी आणि शरद पवार यांच्यावर टीकाही केली. राज्य सरकारनं मशिदीवरील भोंगे उतरवण्याबाबत निर्णय घेतला नाहीतर मशिदी समोर हनुमान चालिसा दुप्पट आवाजात लावू, अशा इशारा ठाकरे यांनी दिला होता. दरम्यान, आज चांदिवली विधानसभा मतदारसंघातील मनसे कार्यालयाबाहेर महेंद्र भानुशाली यांनी भोंगे लावले होते. यानंतर भानुशाली यांना पोलिसांनी समज दिल्यानंतरही भोंगे न उतरवल्यामुळं अखेर पोलिसांनीच कार्यालयाबाहेरील भोंगे उतरवले आहेत. या घटनेत महेंद्र भानुशाली यांनी पोलिसांनी ताब्यात घेतलं असल्याची माहिती मिळत आहे.

दरम्यान, मुंबई घाटकोपर येथील मनसे कार्यायलयाबाहेरील भोंगे पोलिसांनी उतरवले आहेत. मशिदीवरील भोंगे उतरवा अन्यथा आम्ही त्यासमोर हनुमान चालिसा लावू, असं राज ठाकरे काल म्हणाले होते. पोलिसांनी अगोदर समज देऊन त्यानंतर भोंगे उतरवण्यात आल्याची माहिती आहे. मनसेचे चांदिवली विभागातील कार्यालयासमोरील झाडावर लावण्यात आलेले भोंगे उतरवण्यात आले आहेत. मनसेचे महेंद्र भानुशाली यांनी पोलिसांनी ताब्यात घेऊन त्यांना चिरागनगर पोलिस ठाण्यात नेण्यात आलं आहे. कोणत्याही प्रकारची परवानगी न घेता भोंगे लावल्यानं ही कारवाई करण्यात आली असल्याचे पोलिसांनी सांगितले आहे.

काय म्हणालेत महेंद्र भानुशाली

राज ठाकरे यांच्या आदेशानुसार आज भोंगे लावणे सुरू होते. आज चांदीवलीमध्ये त्याची सुरुवात झाली आहे. मात्र अचानक काय झालं आणि पोलिस दबावू आणू लागले. भोंगे लावले म्हणून 5 हजार 50 रुपयांचा फाईन लावला. भोंगे परत लागले तर कारवाई करू असेही सांगण्यात आले. मात्र परत भोंगे मिळाले तर मी परत लावणार आहे. मी गणपती बाप्पाची आरती सुरू केली आहे. हा फक्त मनसेचा टिझर आहे. पुढे बघा, असा इशारा भानुशाली यांनी दिला आहे. आम्ही मनसेचे कार्यकर्ते सक्षम आहोत, असेही ते म्हणाले आहेत.