मुंबई : आरोग्य विषयक जनजागृतीसाठी सार्वजनिक आरोग्य विभागाच्यावतीने महाआरोग्य चित्रपट महोत्सवाचे आयोजन करण्यात आले आहे, अशी माहिती राज्याचे आरोग्य मंत्री राजेश टोपे यांनी दिली आहे. चित्रपट हा आपल्या सर्वांचा जिव्हाळ्याचा विषय आहे. चित्रपट हा मनोरंजनाबरोबरच लोकशिक्षणाचीदेखील महत्त्वाची भूमिका साकारण्याचे काम करत असतो. त्यात लघूपट हा भावना जागृत करणारा असल्याचे टोपे यांनी म्हटले आहे.

समाजात घडत असलेल्या अनेक गोष्टींचे प्रतिबिंब चित्रपटांमध्ये उमटतांना दिसते. या माध्यमाचा वापर जनजागृती आणि लोकशिक्षणासाठी करण्यात आल्याची उदाहरणे आपण बघितली आहे. याच धर्तीवर हा चित्रपट महोत्सवाचे आयोजन करण्यात आल्याचे टोपे यांनी यावेळी सांगितले. मनोरंजनातून लोकशिक्षण हा यामागील उद्देश आहे. या महोत्सवामध्ये सहभागी होण्यासाठी आपण तयार केलेली फिल्म 7 मार्चपर्यंत iecmaff22@gmail.com या ई-मेल आयडीवर पाठवण्याचे आवाहन आरोग्य विभागाकडून करण्यात आले आहे.