Maharashtra Budget 2023 : राज्यातील सत्तांतरानंतर सत्तेवर आलेल्या सध्याची शिवसेना आणि भाजपा सरकारचा हा पहिलाच अर्थसंकल्प आहे. सन 2023-24 या आर्थिक वर्षाचा अर्थसंकल्प आज विधिमंडळात सादर होत आहे.

गेल्यावर्षी जूनअखेरीस सत्तेवर आलेल्या मुख्यमंत्री एकनाथ शिंदे यांच्या नेतृत्वाखालील सरकारचा हा पहिलाच अर्थसंकल्प आहे. यावेळी उपमुख्यमंत्री तथा अर्थमंत्री देवेंद्र फडणवीस (Devendra Fadnavis) प्रथमच विधिमंडळात अर्थसंकल्प मांडत आहेत.

उपमुख्यमंत्री तथा अर्थमंत्री देवेंद्र फडणवीस यांनी आज अर्थसंकल्प सादर होण्यापूर्वी विधीमंडळाबाहेरील छत्रपती शिवाजी महाराजांच्या (Chhatrapati Shivaji Maharaj) पुतळ्याला पुष्पहार अर्पण करून दर्शन घेतलं. त्यानंतर त्यांनी अर्थसंकल्प वाचनाला सुरूवात केली.

अर्थमंत्री फडणवीस यांनी अर्थसंकल्पात मोठ्या घोषणा केल्या आहेत. छत्रपती शिवाजी महाराजांच्या शिवराज्याभिषेकाचं हे 350 वं वर्ष असून या महोत्सवासाठी 350 कोटींची तरतूद करण्यात आली आहे. तसेच आंबेगाव (पुणे) इथं छत्रपती शिवाजी महाराज संकल्पना उद्यानासाठी 50 कोटी, शिवाय मुंबई, अमरावती, नाशिक, छत्रपती संभाजीनगर, नागपूर इथं शिवचरित्रावरील उद्यानांसाठी 250 कोटींची तरतूद केली आहे.

याशिवाय, शिवनेरी किल्ल्यावर शिवछत्रपतींच्या जीवनचरित्रावर संग्रहालय आणि शिवकालिन किल्ल्यांच्या संवर्धनासाठी 300 कोटी रुपयांची तरतूद अर्थसंकल्पात करण्यात आली आहे.