कायद्यानुसार आणि नियमांनुसार योग्य ती कारवाई होईल. पोलिस स्वतंत्र्यपणे त्यांचं काम करतील, अशी प्रतिक्रिया गृहराज्यमंत्री शंभूराज देसाई यांनी दिली आहे. केंद्रीय मंत्री नारायण राणे यांनी मुख्यमंत्री उद्धव ठाकरे यांच्याबद्दल केलेल्या आक्षेपार्ह वक्तव्यानंतर राज्यभर संतापाची लाट उसळली आहे. राजकीय आणि सामाजिक क्षेत्रातून नाराजी व्यक्त केली जात आहे. गृहराज्यमंत्री शंभूराज देसाई यांनी यावर प्रतिक्रिया दिली आहे.

कायदा आणि सुव्यस्था अबाधित राखण्याचं काम पोलिस प्रशासन नक्कीच करेल. परंतु शासन म्हणून आमची अशीही जबाबदारी आहे की, या असंतोषाची सुरुवात नेमकी कुठून झाली? कायदा सुव्यवस्था बिघडावायला जबाबदार कोण आहे? याचा शोध घ्यावा लागेल. आम्ही तो घेऊ. ती व्यक्ती कितीही मोठी असेल तरीही कायद्याप्रमाणेच कारवाई होईल, असे देसाई यांनी सांगितले.

शंभूराज देसाई म्हणाले, केंद्रीय मंत्री नारायण राणे यांनी मुख्यमंत्री उद्धव ठाकरे यांच्यावर केलेलं वक्तव्य अतिशय बेजबाबदार आहे. तसेच केंद्रीय मंत्रिपदावर असणाऱ्या वक्तीला न शोभणारे आहे. केंद्रात मंत्रिपद मिळाल्यापासून राणेंचं आभाळ दोन बोट ठेंगणं झाल्यासारखं वागण-बोलणं सुरु आहे. उद्धव ठाकरे यांच्याबद्दल असं बोलणं शिवसैनिक कधीही सहन करणार नाहीत. राज्यातील शिवसैनिकांच्या रोषाला नारायण राणे यांना सामोरं जावं लागेल. त्यामुळे माझं स्पष्ट मत आहे की, राणे यांनी आपले शब्द मागे घ्यावेत. जर तसे नाही झालं तर शिवसैनिकांचा उद्रेक होईल, त्याला राणे जबाबदार असतील.