नाशिक: समाजात दुहीचे वातावरण आक्रमकपणे आणि जाणीवपूर्वक तयार केले जात आहे. त्यामुळे आम्ही अस्वस्थ झालो आहोत, असे म्हणत कला, सांस्कृतिक, साहित्यिक, सामाजिक क्षेत्र एकवटले आहे. सध्याच्या परिस्थितीच्या पार्श्‍वभूमीवर शांतता आणि संवाद यावर विश्‍वास दाखवण्यासाठी आणि दुही माजविण्याच्या घटनांबद्दलची अस्वस्थता प्रेमाच्या मार्गाने महाराष्ट्रदिनी (ता. १) व्यक्त केली जाणार आहे, असे या क्षेत्रातील मान्यवरांनी म्हटले आहे.

विविधतेत एकतेचा वारसा सांगणाऱ्या देशातील धर्मांमध्ये दुही माजवून समाजात तेढ निर्माण करण्याचे प्रयत्न हल्ली हेतुपुरस्सर वरचेवर होत असलेले दिसत आहेत. आपल्या आसपासचा उन्माद, भय आणि सामाजिक ताण-तणाव दिवसेंदिवस वाढत चालला आहे. त्याने आम्ही अस्वस्थ आणि व्यथित झालो आहोत. सामाजिक बंधुभाव, शांतता, प्रेम आणि सहिष्णुता ही मूल्ये आम्ही मानतो. समाजातील प्रश्न सोडविण्याचा मार्ग परस्पर संवादाचा असतो. याला अनुसरून शांततेच्या मार्गाने कार्यक्रम होणार आहे. हा कार्यक्रम कुठल्याही संघटनेचा, पक्षाचा अथवा एका व्यक्तीचा नाही, तर सर्वांचा आहे, असे प्रसिद्धीपत्रकात नमूद केले आहे.

कार्यक्रमातील सहभाग

प्रेमाच्या मार्गाने अस्वस्थता व्यक्त करण्यात येणाऱ्या कार्यक्रमात महात्मा गांधी यांचे पणतू तुषार गांधी, ज्येष्ठ अभिनेते अमोल पालेकर, लेखक अशोक शहाणे, समीक्षक वसंत आबाजी डहाके, सुधीर आणि शांता पटवर्धन, प्रभाकर कोलते, रंगनाथ पठारे, सुभाष अवचट, जयंत भीमसेन जोशी, प्रा. हरिश्‍चंद्र थोरात, लेखक डॉ. हरी नरके, अच्युत गोडबोले, रामदास भटकळ, राष्ट्रीय बंधुता पुरस्कार विजेत्या डॉ. रझिया पटेल, ऊर्मिला पवार, संध्या नरे- पवार, भारतीय संगीत तज्ज्ञ नीला भागवत, राजन गवस, मुकुंद टाकसाळे, सुनील तांबे, सुमती लांडे, श्रीकांत देशमुख, सतीश तांबे, नीरजा, प्रेमानंद गज्वी, डॉ. राजीव नाईक, मकरंद साठे, नाटककार शफाअत खान, अभिनेते अतुल पेठे, सुनील सुकथनकर, अभिनेते व दिग्दर्शक पुरुषोत्तम बेर्डे, इरावती कर्णिक, आलोक राजवाडे, निपुण धर्माधिकारी, गजानन परांजपे, आशिष मेहता, संदीप मेहता, मनस्विनी लता रवींद्र, अभिनेते अरुण कदम, डॉ. मुक्ता पुणतांबेकर, डॉ. हमीद दाभोलकर, दत्ता पाटील, सचिन शिंदे, श्‍यामला चव्हाण.