मुंबई : विधीमंडळाच्या पावसाळी अधिवेशनाला सुरूवात झाली आहे. यावेळी मुख्यमंत्री एकनाथ शिंदे यांनी नव्या मंत्र्यांची ओळख करून दिली. त्याचबरोबर शेतकरी प्रश्नाच्या मुद्द्यावर विरोधकांनी सभात्याग केला आहे. "घटनाबाह्य आणि कलंकित सरकारचा धिक्कार असो" अशा आशयाचे पोस्टर घेऊन विरोधकांनी सकाळी विधानसभेच्या पायऱ्यावर आंदोलन केले आहे.

दरम्यान, "सासूमुळे वाटणी झाली आणि सासूच वाट्याला आली", "५० खोके एकदम ओके" अशी जोरदार घोषणाबाजी आज पावसाळी अधिवेशनाच्या पहिल्या दिवशी महाविकास आघाडीच्या आमदारांनी विधिमंडळाच्या पायऱ्यांवर केली.

अधिवेशन सुरू झाल्यानंतर पहिल्याच दिवशी दोन्ही सभागृहाचे कामकाज आजच्या दिवसासाठी स्थगित करण्यात आलं आहे. सरकारमधील नव्या मंत्र्यांची ओळख करून दिल्यानंतर शोक प्रस्ताव मांडला गेला आणि विधानपरिषदेच्या सभापती आणि विधानसभेच्या अध्यक्षांकडून आजचे कामकाज तहकूब करण्यात आले आहे.