गेल्या काही दिवसांपासून राज्यात सत्ताबदलाचे वारे वाहू लागलं आहे. भावी मुख्यमंत्री हा राष्ट्रवादीचाच असणार असा ठोस दावा कार्यकर्ते करताना दिसत आहेत. अशातच विरोधी पक्ष नेते अजित पवार यांनी प्रदेशाध्यक्ष जयंत पाटील यांच्या एका विधानाला सहमती दर्शवली आहे. पण राजकीय वर्तुळात वेगळीच चर्चा सुरु आहे. (Maharashtra Politics Ajit Pawar Jayant Patil big statement CM)

कथित नाराजी नाट्यानंतर राजकीय वर्तुळात राष्ट्रवादीबद्दल उलटसुलट चर्चा आहे. राज्यातील अनेक ठिकाणी अजित पवार यांचे भावी मुख्यमंत्री म्हणून बॅनर झळकले आहेत. तर खासदार अमोल कोल्हे यांनी मुख्यमंत्री पदासाठी जयंत पाटील यांचा चेहरा योग्य असल्याचे म्हटले आहे.

अशातच, जयंत पाटील यांनी पुढील मुख्यमंत्री राष्ट्रवादीचाच असणार असं म्हटलं आहे. त्यांच्या वक्तव्यानंतर जयंत पाटलांच्या तोंडात साखर पडो, त्यांचं म्हणणं खरं ठरो, असं अजितदादांनी म्हटलं आहे.

त्यामुळे आता राजकीय वर्तुळात राष्ट्रवादीचा मुख्यमंत्री होणार, पण नक्की कोण? असा सवाल उपस्थित होत आहे. राष्ट्रवादी काँग्रेसमध्ये दोन गट निर्माण झाले असून येत्या काळात राज्याच्या राजकारणात उलटफेर होण्याची शक्यता देखील वर्तविण्यात येतीये. त्यापूर्वी एका मुलाखतीत अजित पवार यांनीदेखील मुख्यमंत्री होण्याची इच्छा व्यक्त केली होती.