शिवसेना आणि केंद्रीय मंत्री नारायण राणे यांच्यातील वाद काही केल्या थांबताना दिसत नाही. दररोज दोन्ही बाजूने एकमेकांवर आरोप-प्रत्यारोपाच्या फैरी झडताना दिसत आहे. नारायण राणे यांनी शिवसेनेवर निशाणा साधताना बाळासाहेब ठाकरे यांना दिलेल्या वचनाची आठवण सांगितली. मी ठाकरे कुटुंबियांना त्रास देणार नाही, असा शब्द बाळासाहेब ठाकरेंना दिला होता. त्यांनी ज्या हेतूनं तो शब्द माझ्याकडून घेतला होता ते मी सांगू शकत नाही. पण आज जे काही घडतंय त्यामुळे मला हे बोलावं लागतेय, असे राणे म्हणाले. एबीपी माझा या वृत्तवाहिनीला दिलेल्या मुलाखतीत नारायण राणे बोलत होते.

सध्या जे काही सुरु आहे ते शिवसेनेनं सगळे थांबवावे. उद्धव ठाकरे यांच्याशी माझं वैयक्तिक काहीही वाईट नाही. माझी प्रकरणं बाहेर काढायची आहेत तर काढा, मग 'त्या' हत्या करायला कुणी सांगितल्या याची पण चौकशी करा, असा खळबळजनक गौप्यस्फोट केंद्रीय मंत्री नारायण राणे यांनी केला आहे.

उद्धव ठाकरे संजय राऊतांच्या माध्यमातून सगळे करत आहेत. माझ्यावर अथवा माझ्या कुटुंबियांवर जर कोण बोललं तर मी कसा सोडणार? असा इशारा नारायण राणे यांनी दिला. संजय राऊत यांचा बोलवता धनी कोण? ते आधी तपासा. मी स्वभावाने आक्रमक आहे. मी आधी कधी आदित्य व उद्धवजींवर कधी बोललो नाही. पण आज बोलावं लागतंय. सामनामधून होणारी टीका थांबवली नाही तर प्रहार मधून उत्तर देणार. संजय राऊत शिवसेना संपवण्याचे काम करत आहेत, असे राणे म्हणाले.