Jitendra Awhad News : सत्तांतरानंतर अनेक राजकीय घडामोडी घडत असून, अनेकांनी शिवसेनेची साथ सोडून एकनाथ शिंदेंना पाठिंबा दिला आहे. एवढेच नव्हे तर, अनेक राजकीय नेते एकनाथ शिंदेंची वेळोवेळी भेट घेत असून, आता राष्ट्रवादीचे नेते जितेंद्र आव्हाड स्वतः एकनाथ शिंदेंची भेट घेण्यासाठी गेल्याचे सांगितले जात आहे. ही भेट नेमकी कोणत्या कारणासाठी आहे याबद्दल अद्याप कोणतीही माहिती समोर आलेली नाही. मात्र, यामुळे अनेक चर्चांना उधाण आले आहे.

आव्हाडांसोबत शिंदे गटातील संजय शिरसाट हे देखील शिंदेंची भेट घेण्यासाठी गेले आहेत. त्यात शिरसाटांना अनेक दिवसांपासून विविध पदांसाठी सातत्याने डावललं जात आहे. त्यात तेदेखील शिंदेंच्या भेटीला गेल्यामुळे नेमकं शिरसाटांच्या मनात काय चालू आहे? हे काही केल्या समोर आलेले नाही.

सत्तेत आल्यानंतर शिंदे-फडणवीसांनी मविआ काळात घेतलेले अनेक निर्णय रद्द करण्याचा धडाका लावला आहे. त्यात आता आव्हाड स्वतः शिंदेंच्या भेटीला गेले आहेत. त्यामुळे या दोन्ही नेत्यांच्या भेटीदरम्यान नेमकी कोणत्या विषयांवरून चर्चा होते याची उत्सुकता सर्वांना लागली आहे.

शिंदे गटातील मंत्री खात्यांबाबत असमाधानी

तर, दुसरीकडे आव्हाडांसोबत शिंदे गटातील आमदार संजय शिरसाट हे देखील शिंदेंच्या भेटीला गेले आहे. गेल्या काही दिवसांपासून शिरसाटांना विविध पदांपासून दूर ठेवण्याचा प्रयत्न केला जात असल्याचे दिसून येत आहे. त्यामुळे ते नाराज असल्याचे सातत्याने सांगितले जात आहे. मात्र, आपण नाराज नसल्याचे शिंदे जी जबाबदारी देतील ती संभाळू असे शिरसाटांनी याआधी स्पष्ट केले आहे. तर दुसरीकडे शिंदे गटातील काही मंत्री हे खात्याबाबत असमाधानी असल्याचेही सांगितले जात आहे.

ग्रामीण भागाशी संबंधित खातं मिळावं, यासाठी शिंदे गटातील काही जण आग्रही असल्याचे सांगितले जात आहे. ग्रामविकास, जलसंपदा किंवा सार्वजनिक बांधकाम खात्यासाठी शिंदे गटातील काही मंत्री इच्छुकअसून, या खात्यांसाठी काही मंत्री नाराज असल्याचे सांगण्यात येत आहे. सध्या सार्वजनिक बांधकाम खातं हे मुख्यमंत्री एकनाथ शिंदे यांच्याकडेच आहे. तर ग्रामविकास आणि जलसंपदा ही खाती अनुक्रमे गिरीष महाजन आणि देवेंद्र फडणवीसांकडे आहे.