कर्नाटकचा पराभव भाजपच्या जिव्हारी लागला आहे. कर्नाटकातील हातची सत्ता गमावल्यानंतर महाराष्ट्रातील सत्ता वाचवण्यासाठी भाजपच्या गोटात हालचालींना वेग आला आहे. त्यानुसार भाजपनं पावलं उचलण्यास सुरुवात केली आहे. यासाठी बडा नेता मुंबई दौऱ्यावर येणार आहे.

आगामी लोकसभा, विधानसभा आणि पालिका निवडणुकीच्या तोंडावर भाजपने कंबर कसली आहे. अशातच भाजपने आता आपला मोर्चा तरुणांकडे वळवला आहे.

राज्यात आधीच पर्यटन मंत्री मंगलप्रभात लोढा यांच्यावतीने युवकांसाठी रोजगार मेळाव्याचे आयोजन होत असताना आता मुंबईतील युवकांना भाजप साद घालणार आहे. यासाठी येत्या 18 मे रोजी युवा संवाद मेळाव्याचे आयोजन करण्यात आले आहे.

या मेळाव्याला भाजपचे राष्ट्रीय अध्यक्ष जे.पी. नड्डा उपस्थित राहणार आहेत. युवा संवाद मेळाव्यातून युवकांना करिअर बाबत मार्गदर्शन केले जाणार आहे.

येत्या निवडणुकीत भाजप नवीन मतदारांना आकर्षित करण्यासाठी भाजपने सुरुवात केली आहे. साठी सामाजिक कार्यकर्ते. पत्रकार आदींशी संपर्क सांधण्यास सांगितले आहे. भाजपचे आमदार, खासदार यांना कामगार, महिला, युवकांशी संपर्क साधण्याचे आदेश दिले आहेत.

कर्नाटक विधानसभा निवडणुकांचे निकाल शनिवारी जाहीर झाले. यात काँग्रेसने भाजपचा सुपडा साफ केला आहे. काँग्रेसला स्पष्ट बहुमत मिळाले आहे. 224 जागांच्या कर्नाटक विधानसभा निवडणुकीत 113 हा बहुमताचा आकडा आहे.

त्याच्या खूप पुढे जात 135 जागांवर विजय मिळवत काँग्रेस सर्वात मोठा पक्ष बनला आहे, तर विजयाचा दावा करणाऱ्या भाजपला कर्नाटकच्या जनतेने नाकारलं आहे. भाजपची 65 जागांवर घसरगुंडी झाली आहे.