Maharashtra Politics:  शिवसेना आमदार अपात्र प्रकरणी कारवाई करण्यात दिरंगाई होत असल्यामुळे काल (सोमवार) सर्वोच्च न्यायालयाने राहुल नार्वेकर यांना फटकारले. महाराष्ट्र विधानसभेचे अध्यक्ष राहुल नार्वेकर यांनी आतापर्यंत काय केले ते दोन आठवड्यांत सांगावे, असे सर्वोच्च न्यायालयाने म्हटले आहे. महाराष्ट्र विधानसभा अध्यक्षांना आमदारांच्या अपात्रतेचा निर्णय घ्यावा लागेल आणि न्यायालयाचा सन्मान पाळावा लागेल.

माजी मुख्यमंत्री उद्धव ठाकरे गटाने मुख्यमंत्री एकनाथ शिंदे यांच्यासह १६ आमदारांच्या अपात्रतेबाबत लवकरात लवकर निर्णय घेण्यासाठी सर्वोच्च न्यायालयात याचिका दाखल केली आहे. याप्रकरणी विधानसभा अध्यक्ष निर्णय घेण्यास विलंब करत असल्याचा आरोप त्यांनी केला. दरम्यान कोर्टाच्या सुनावणीनंतर राष्ट्रवादी काँग्रेस आणि ठाकरे यांच्या शिवसेनेने राहुल नार्वेकर यांच्यावर टीका केली आहे.

खासदार संजय राऊत यांनी विधानसभा अध्यक्ष राहुल नार्वेकर यांच्यावर टीका केली. आमदार अपात्रतेच्या याचिकांवर निर्णय घेण्यास जाणीवपूर्वक विलंब केल्याचा आरोप राऊत यांनी केला. राहुल नार्वेकर हे असंवैधानिक सरकारला पाठिंबा देत आहेत. सर्वोच्च न्यायालयाने स्पष्ट केले आहे की, राजकीय पक्षाचे काही आमदार दुसऱ्या पक्षात जाणे म्हणजे विभाजन होत नाही, असे राऊत यांनी स्पष्ट केले.

सुप्रीम कोर्टाच्या स्पष्ट निर्देशानंतर देखील विधानसभा अध्यक्ष अपात्र याचिकांवर निर्णय घेण्यास वेळखाऊपणा करत आहेत. तसेच ते राज्यातील असंवैधानिक सरकारला पाठिंबा देत आहेत. आम्ही सर्वोच्च न्यायालयासमोर या समस्यांचा सांगणार असून आम्हाला न्याय मिळेल, अशी आशा आहे.

राष्ट्रवादी काँग्रेसचे प्रवक्ते क्लाईड क्रॅस्टो यांनी 'X' वरील पोस्टमध्ये म्हटले आहे, “महाराष्ट्र   विधानसभेचे अध्यक्ष राहुल नार्वेकर यांनी केलेल्या दिरंगाईवर आता प्रश्न उपस्थित केले पाहिजेत. कारण शिवसेनेच्या आमदारांच्या अपात्रतेच्या याचिकेवर सर्वोच्च न्यायालयानेही त्यांनी केलेल्या दिरंगाईबद्दल नाराजी व्यक्त केली आहे. त्यांनी त्वरीत कारवाई करावी आणि लवकरात लवकर निकाल द्यावा.”