संजय राऊत अजूनही राज ठाकरेंच्या जवळचे? असा प्रश्न राजकीय वर्तुळात सध्या उपस्थित होत आहे. छोट्या पडद्यावरील प्रसिद्ध शो ‘खुपते तिथे गुप्ते’ मध्ये काही गोष्टींचा खुलासा शिवसेना खासदार संजय राऊत यांनी केला आहे. (Maharashtra Politics Sanjay Raut close still to Raj Thackeray )

महाबळेश्वर येथे झालेल्या अधिवेशनापासून नाराज असलेल्या राज ठाकरे यांनी वेगळी वाट निवडली. शिवसेनेतून पहिल्यांदा एक 'ठाकरे' बाहेर पडले होते. राज ठाकरे यांनी भावूक भाषण दिलं आणि शिवसेनेला 'जय महाराष्ट्र' केला. राज ठाकरे यांच्या राजीनाम्याचं पत्र संजय राऊतांनी लिहिलं, अशी चर्चा आजही राजकीय वर्तुळात सुरु असते.

दरम्यान, या सर्वावर राऊत यांनी भाष्य करत अप्रत्यक्षपणे राज ठाकरे अजूनही जवळचे असल्याचे म्हटले आहे.

संजय राऊत नेमकं काय म्हणाले?

राज ठाकरे यांच्या राजीनाम्याचं पत्र तुम्हीच लिहिलं होतं, असा तुमच्यावर आरोप आहे, असा सवाल अवधूत गुप्ते यांनी केला. त्यावर उत्तर देताना, 'राज ठाकरे आणि माझी मैत्री ही जगजाहीर होती. त्या काळात आम्ही चांगले मित्र होतो.

आम्ही एकमेकांकडे अनेक भावना व्यक्त देखील करायचो. त्यामुळे त्यांच्या मनात काय चाललंय? याची मला कल्पना होती. आम्ही बाळासाहेब ठाकरे यांच्याशी चर्चा केली होती. पण ही कुटुंबात पडलेली फूट आहे.''

मी पक्षाचा किंवा उद्धव ठाकरेंचा मालक नाही. मी राज ठाकरे यांच्या फार जवळचा होतो, असा आरोप केला जात होता. मी अनेकांच्या जवळ आहे. त्यांच्याबरोबरची नाती मी टिकवून ठेवलीयेत हे अनेकांना खुपतं, असं म्हणत त्यांनी वर्षानुवर्ष रुतलेला काटा काढण्याचा प्रयत्न केला आहे.