नागपुरात शिवसेनेचे उद्धव ठाकरे गटाचे आमदार नितीन देशमुख आणि त्यांच्या समर्थकांनी पोलिस अधिकाऱ्यांना मारहाण केल्याची घटना समोर आली आहे. नितीन देशमुख कार्यकर्त्यांसह रवी भवनमध्ये घुसण्याचा प्रयत्न करत असल्याचे वृत्त आहे.

मात्र पोलीस अधिकाऱ्यांनी त्यांना रोखले. यानंतर आमदार आणि त्यांच्या समर्थकांची पोलिसांशी बाचाबाची झाली. नितीन देशमुख हे अकोला जिल्ह्यातील बाळापूर विधानसभा मतदारसंघाचे आमदार आहेत.

मिळालेल्या माहिती नुसार नागपूर पोलिसांनी या प्रकरणी आमदार नितीन देशमुख आणि त्यांच्या समर्थकांवर गुन्हा दाखल केला आहे. पोलिसांनी नोंदवलेल्या एफआयआर नुसार, मंगळवारी संध्याकाळी 6 वाजण्याच्या सुमारास आमदार नितीन देशमुख त्यांच्या काही सहकाऱ्यांसह कारमध्ये रवी भवनमध्ये पोहोचले आणि इमारतीत जात होते.

देशमुख यांना त्यांच्या समर्थकांच्या प्रवेशासाठी प्रवेश पास घेण्यास सांगण्यात आले, मात्र, सुरुवातीला त्यांच्या समर्थकांसाठी प्रवेश पास घेण्याचे मान्य केल्यानंतर त्यांनी नंतर नकार दिला. त्यानंतर पोलिस कर्मचाऱ्यांशी त्यांचा वाद झाला. त्यामध्ये देशमुख यांच्यासोबत असलेल्या सहकाऱ्यांनी पोलिसांना अश्लील शिवीगाळ केल्याचा आरोप आहे.