मुंबई आणि पुणे शहरांमध्ये मध्यरात्रीपासून जोरदार पावसाला सुरुवात झाली आहे. दोन दिवसांच्या विश्रांतीनंतर नवी मुंबईत पावसाला पुन्हा सुरुवात झाली आहे. सकाळपासून रिमझिम पावसाच्या सरी बरसत आहेत. नवी मुंबईत काही ठिकाणी जोरदार तर काही ठिकाणी रिमझिम पाऊस सुरू आहे.

पुण्यात ऑरेंज अलर्ट-

पुणे शहर आणि परिसरात गेल्या दोन दिवसांपासून पावसाचा जोर ओसरला होता. मात्र, मध्यरात्रीपासून पावसाला पुन्हा सुरुवात झाली आहे. हवामान खात्याने उद्यापासून (गुरुवार) तीन दिवस पुणे जिल्ह्याला मुसळधार पावसाचा ‘ऑरेंज अलर्ट’ दिला आहे. आज बुधवारी (ता. ३१) पावसाचा ‘यलो अलर्ट’ देण्यात आला आहे. घाटमाथ्यावर मुसळधार पावसाच्या सरी तर शहर परिसरात मध्यम पावसाची शक्यता वर्तवण्यात आली आहे.

जुलैमधील पावसाची स्थिती-

पुण्यात गेल्या गुरुवारी २४ तासांत ११४.१ मिलिमीटर पाऊस पडला होता. त्यानंतर पाच दिवसांत पावसाचा जोर कमी झाला असून, या चार दिवसांमध्ये ७६.८ मिलिमीटर पावसाची नोंद झाली. प्रत्यक्षात सरासरीच्या तुलनेत यंदा २८६.८ मिलिमीटर पाऊस जास्त पडला असल्याची माहिती हवामान खात्याने दिली आहे. पुणे जिल्ह्यात १ ते ३० जुलै दरम्यान सरासरी ३००.६ मिलिमीटर पाऊस पडतो, परंतु यंदा ५९४.९ मिलिमीटर पावसाची नोंद झाली आहे.

राज्यातील इतर भागांमध्ये पावसाची स्थिती-

भारतीय हवामान खात्याच्या अंदाजानुसार, आज मुंबई, कोकण घाटमाथा तसेच पूर्व विदर्भात तुरळक ठिकाणी जोरदार पाऊस होईल. यामुळे या भागांना पावसाचा यलो अलर्ट जारी करण्यात आला आहे. मराठवाडा आणि विदर्भातील काही जिल्ह्यांमध्ये विजांच्या कडकडाटासह जोरदार पाऊस पडण्याची शक्यता आहे. बुलडाणा, अकोला, अमरावती, वाशीम, यवतमाळ, वर्धा, नागपूर, भंडारा, गोंदिया या जिल्ह्यांना पावसाचा यलो अलर्ट जारी करण्यात आला आहे.

मुंबईत पावसाची स्थिती-

मुंबई शहर आणि उपनगरांमध्ये गेल्या आठवड्यात मुसळधार पाऊस झाला होता. त्यानंतर पावसाचा जोर काहीसा ओसरला होता. मात्र, आज सकाळी आणि मध्यरात्रीपासून पुन्हा पावसाला सुरुवात झाली आहे.