मुंबई- राज्यातील कोरोनाबाधित रुग्णांच्या संख्येत दिवसेंदिवस वाढ होताना दिसत आहे. राज्यात गेल्या २४ तासांत 59 हजार ९०७ कोरोनाबाधित रुग्ण आढळून आले आहेत, तर ३० हजार २९६ लोकांनी कोरोना विषाणूवर मात केली आहे. कोरोना विषाणूमुळे मृत्यू पावणाऱ्या रुग्णांची संख्याही वाढली आहे. गेल्या २४ तासांत ३२२ कोरोना रुग्णांचा मृत्यू झाला आहे. महाराष्ट्रातील कोरोनाबाधित रुग्णांच्या संख्येत झपाट्याने वाढ होत असल्याचं पाहायला मिळतंय. मार्च महिन्याच्या शेवटापासून ही वाढ लक्षणीय आहे. राज्यात आतापर्यंत ३१ लाख ७३ हजार २६१ रुग्णांना कोरोनाची लागण झाली आहे, तर २६ लाख १३ हजार ६२७ लोकांनी आतापर्यंत कोरोनावर मात केली आहे. कोरोना विषाणूने आतापर्यंत ५६ हजार ६५२ लोकांचा बळी घेतला आहे. राज्यात सध्या ५ लाख १ हजार ५५९ कोरोनाचे सक्रिय रुग्ण आहेत. आरोग्य मंत्रालयाने यासंदर्भातील माहिती दिली आहे. 

भारतात कोरोनाबाधित रुग्णांची संख्या दिवसेंदिवस वाढत आहेत. कोरोनावर मात करण्यासाठी देशात लसीकरण मोहीम हाती घेण्यात आली आहे. सुरुवातीच्या टप्प्यामध्ये आरोग्य कर्मचारी आणि फ्रंटलाईन वर्कर्संना कोरोनाची लस देण्यात आली. दुसऱ्या टप्प्यामध्ये 60 वर्षांपेक्षा अधिक वय असलेली व्यक्ती आणि असाध्य रोगाने ग्रासलेल्या 45 वर्षांपुढील व्यक्तींना कोरोनाची लस देण्यात आली. 1 एप्रिलपासून लसीकरणाचा तिसरा टप्पा सुरु करण्यात आला असून यात 45 वर्षांपेक्षा जास्त वय असणाऱ्या सर्व व्यक्तींना कोरोनाची लस दिली जात आहे. लसीकरण होत असलं तरी देशात कोरोना रुग्ण वाढ थांबण्याचं नाव घेत नाहीये. त्यामुळे देशातील सरसकट नागरिकांना कोरोनाची लस देण्यात यावी. यात वयाचं मर्यादा असू नये अशी मागणी होतं आहे.