विधानसभा 2019 : मुंबई - महाराष्ट्रातील विधानसभेच्या निवडणुकीची घोषणा झाल्यानंतर वृत्तवाहिन्यांनी केलेल्या ताज्या सर्वेक्षणाचे निष्कर्ष जाहीर केले. त्यानुसार सत्ताधारी भाजप- शिवसेनेची युती पुन्हा सत्तेवर येण्याची शक्‍यता वर्तविण्यात आली आहे.

झी २४ तास आणि एबीपी माझा - सी व्होटर यांनी केलेल्या सर्वेक्षणात भाजपला राज्यात पुन्हा मोठे यश मिळू शकते, असे चित्र आहे. भाजप आणि शिवसेना वेगवेगळे लढल्यास त्याचा शिवसेनेला मोठा फटका बसण्याची शक्‍यता आहे. 

एबीपी माझा - सी व्होटरच्या सर्वेक्षणानुसार युती न झाल्यास भाजप १४४ जागांसह स्वबळावर सत्तेवर येऊ शकतो, तर अशा स्थितीत शिवसेनेला अवघ्या ३९ जागांवर समाधान मानावे लागणार असल्याचे दिसते. भाजप व शिवसेनेची युती झाल्यास २०५ जागांसह सत्तेचा मार्ग मोकळा होऊ शकतो, असे दिसते आहे. काँग्रेस आणि राष्ट्रवादी काँग्रेसला या वेळीही विरोधी बाकांवरच बसावे लागणार असल्याचे प्राथमिक सर्वेक्षणातून समोर आले आहे. 

वंचित बहुजन आघाडी या निवडणुकीत चांगली कामगिरी करण्याची शक्‍यता असून, या पक्षाचा विधानसभेत प्रवेश होऊ शकतो, असे दिसून येते.