पुणे : येत्या काही दिवसांत राज्यातील मुंबई, पुणे, नाशिक यासारख्या मोठ्या महापालिकांच्या निवडणुका आहेत. यामध्ये मनसेची (MNS) भाजपसोबत (BJP) युती होणार असल्याच्या चर्चा आहेत. मनसेची युती नेमकी कोणासोबत होणार? याबाबत राज ठाकरेंनी (Raj Thackeray) अद्यापही उत्तर दिलेलं नाही. मात्र, युतीसाठी कोणाकडून प्रस्ताव आलाय? याबाबत राज ठाकरेंनी स्पष्टीकरण दिलं. ते पुण्यात (Raj Thackeray Pune Visit) बोलत होते.

मनसेची युती कोणासोबत?-

मनसेची युती कोणासोबत होणार? याबाबत आम्ही अद्याप काही निर्णय घेतला नाही. निर्णय झाल्यावर तुम्हाला कळवू. पण, सध्या युतीसाठी महाविकास आघाडी आणि भाजपकडून प्रस्ताव आला आहे. पण, कोणासोबत जायचं याचा निर्णय़ अजून घेतलेला नाही, असं राज ठाकरेंनी सांगितलं.

भाजपच्या नेत्यालाही विरोध करा -

सध्या राज ठाकरे आणि भाजपची जवळीकता दिसतेय. पण, पुण्यात त्यांनी थेट भाजपच्या नेत्यांना देखील विरोध करण्याच्या सूचना कार्यकर्त्यांना दिल्या आहेत. काम होत नसेल तर सत्ताधाऱ्यांविरोधात आंदोलन करा. स्थानिक नगरसेवकांची प्रकरणे बाहेर काढा. मग तो भाजपचा नगरसेवक असेल तरीही विरोध करा, असे राज ठाकरे म्हणाले.

कोंढव्यात शाळेचं उद्घाटन -

शिक्षण मंडळाच्या कार्यातून ही वास्तू उभी राहिली. आम्ही आजपर्यंत फक्त भूमिपूजनाच्या पाट्या पाहिल्या. त्यानंतर काम होत नाही. पण, आमचे नगरसेवक असं करत नाहीत. आमचे नगरसेवक जिकडे निवडून आलेत त्यांनी उत्तम काम केलंय. जी आश्वासने दिली ती त्यांनी पाळली. आमच्यावेळी अशा ई-लर्निंग शाळा वगैरे नव्हत्या. आम्ही लर्निंगलाच ईSSS म्हणायचो, असं कोंढव्यातील ई-लर्निंग शाळेचं उद्घाटन करताना राज ठाकरे म्हणाले.

आमच्यावेळी कोरोना कुठं होता? -

कोरोनामुळे सर्व विस्कळीत झालं आहे. दहावीचे विद्यार्थी परीक्षा न देता उत्तीर्ण झाले. आमच्यावेळी हा कोरोना होता कुठं? माझे दहावीचे गुण कळले तर तुम्हाला कमालच वाटेल. मुलं शाळेत खेळताना चांगले दिसतात. यांना अक्षरांची ओळख हाताने लिहून होणार आहे की नाही? अशी चिंता देखील राज ठाकरेंनी व्यक्त केली.