जालना : मराठा समाजाच्या मागण्यांसाठी मनोज जरांगे पुन्हा एकदा आंतरवाली सराटी इथं उपोषणाला बसले आहेत. त्यांच्या उपोषणाचा आज चौथा दिवस असून त्यांची प्रकृती देखील खालावली आहे. यापार्श्वभूमीवर जरांगे यांनी आज पत्रकारांशी संवाद साधला. सरकारची सुरु असलेली चालढकल यावरुन गोड बोलून काटा काढायचा त्यांचा प्रयत्न दिसतोय, अशा शब्दांत जरांगेंनी पुन्हा एकदा सरकारवर गंभीर आरोप केला. (Manoj Jarang who is on hunger strike again in Anrwali Sarati again attack on Maharashtra government)

जरांगे म्हणाले, सरकारच्या कोणत्याही प्रतिनिधीशी अद्याप माझा संवाद झालेला नाही. आता इकडं माझं आमरण उपोषण सुरु आहे. त्यामुळं सरकार बैठका घेऊन तोडगा काढू असं म्हणून मराठ्यांना लाडीगोडी लावत असतील. गोड बोलून काटा काढायचं काम करत असतील एखादे वेळेस असा अंदाजच दिसतोय मला. एकीकडून म्हणायचं आम्ही तातडीनं मार्ग कोढतो आणि इकडं आमरण उपोषण सुरु असलं तरी पाच पाच दिवस होऊ द्यायचे. यामुळं त्यांचा डाव देखील असू शकतो. त्यांना जर मराठ्यांची माया असती तर त्यांनी चार दिवस उगवूच दिले नसते.

छगन भुजबळ यांनी मराठा आरक्षणावर बोलताना म्हटलं होतं की, हे आरक्षण टिकणारं आहे, त्यामुळं मनोज जरांगेंनी विनाकारण वाद वाढवू नये. त्यावर जरांगे यांनी प्रत्युत्तर देताना म्हटलं की, "तू आम्हाला सांगू नकोस आम्हाला कळतं" त्याचबरोबर भुजबळ म्हणाले होते की, मराठा आरक्षणामुळं आम्ही पडलो नाही आणि तसं समजुही नका. त्यावर जरांगे म्हणाले, "थोडं थांबा मराठे त्यांना दाखवतील काय आहे ते?"