Devendra Fedanvis : राज्याचे गृहमंत्री देवेंद्र फडणवीस यांनी नुकतेच मराठा आंदोलकांवर झालेल्या लाठीचार्ज बाबत विधान केले होते. यावेळी त्यांनी पोलिसांची बाजू घेत नक्की मराठा आंदोलकांवर लाठीचार्ज का करण्यात आला? याची माहिती दिली.

यावरून त्यांच्या विरोधात संपूर्ण महाराष्ट्रात आंदोलन सुरू असल्याचे पाहायला मिळत आहे. यावर बोलताना मनोज जरांगे यांनी यावर आपली प्रतिक्रिया दिली आहे. यावेळी ते म्हणाले की, "फडणवीस यांच्या राजीनाम्याची मागणी कित्येक जण करत आहेत. मात्र भाजपने त्यांना पक्षात ठेवूच नये, त्यांनी केलेले विधान हे मराठा विरोधी आहे."

"आम्ही प्रामाणिक लोक आहोत. आम्हाला फडणवीस एक चांगली व्यक्ती वाटायची. मुख्यमंत्री एकनाथ शिंदे तर देवच वाटायचे. मात्र फडणवीस यांच्या मनात मराठा द्वेष असल्याचे आम्हाला पाहायला मिळत आहे. त्यांनी केलेल्या विधानामुळे भाजपमध्येच कित्येक मराठा चेहरे नाराज आहेत. मी त्यांची नावे घेणार नाही. मात्र भाजपमधील मराठा चेहरे नाराज आहेत. ही वस्तुस्थिती आहे." असे यावेळी ते म्हणाले.

"गृहमंत्र्यांसारख्या उच्च दर्जाच्या व्यक्तीला असं बोलणं शोभत नाही. ते असं कसं बोलू शकतात ?आम्ही आमच्या जीवावर आंदोलन करतोय. कोणी गंगेत हात धुवत नाहीये. आम्हाला पाठिंबा देण्यासाठी काही लोकं इथवर आले मात्र फडणवीस अजून आलेले नाहीयेत. त्यांना काढून टाका अन्यथा ते मराठ्यांना गोळ्या घालून मारतील ते आम्हाला मारतील." असे मनोज जरांगे म्हणाले.