मराठा आरक्षण आणि समाजाच्या विविध मागण्यांसाठी मनोज जरांगे-पाटील यांनी आमरण उपोषण सुरू केले आहे. या उपोषणाचा आज तिसरा दिवस आहे. यावेळी जरांगे पाटील यांनी प्रसाद लाड यांनी दिलेल्या आमदारकीच्या ऑफरचा समाचार घेतला.

गेल्या आठवड्यात प्रसाद लाड यांनी जरांगे पाटील यांना 'देवेंद्र द्वेष' झाल्याची टीका केली होती. त्यानंतर जरांगे पाटील यांनी प्रसाद लाड यांना प्रत्युत्तर दिले होते.

दरम्यान काल प्रसाद लाड यांनी, "जरांगे पाटील यांना आमदार व्हायचे असेल तर मी राजीनामा देतो आणि माझ्या जागी त्यांना निवडून आणतो" असा प्रस्ताव दिला होता.

दरम्यान जारांगे पाटील यांनी प्रसाद लाड यांची ऑफर धुडकावत मला राजकारण करायचे नाही असे म्हटले आहे. यावेळी जरांगे पाटील म्हणाले, "प्रसाद लाड यांनी सुपारी घेतली का? मला आमदारकी देऊन आंदोलनाची फोडाफोडी करायची आहे का? त्यांनी यातून राजकीय त्यांची राजकीय जात दाखवलीच. हे सुधारणार नाहीत."

यावेळी बोलताना मनोज जरांगे पाटील यांनी स्पष्ट केले की, त्यांना राजकारणात जायचे नसून, मराठा समाजाच्या आरक्षणाचा प्रश्न महत्त्वाचा आहे.

दरम्यान काल पुणे येथे झालेल्या भाजपच्या अधिवेशनात उपमुख्यमंत्री देवेंद्र फडणवीस यांनी शरद पवार, उद्धव ठाकरे आणि नाना पटोले मराठा समाजाला ओबीसीतून आरक्षण देण्यासाठी तयार आहेत का? असा प्रश्न केला होता.

याबाबत पत्रकारांनी जरांगे पाटील यांना विचारले असता, ते म्हणाले, "हे महायुती आणि आघाडीवाले फक्त टोलवाटोलवी करत आहे. फडणवीसांनी आघाडीवाले काय करणार यापेक्षा ते यासाठी तयार आहेत का सांगावे. जर तयार असतील तर आम्ही समाज म्हणून त्यांच्या मागे उभारू."