मुंबई : शिंदे आणि भाजप सरकारकडून मराठा समाजासाठी मोठा निर्णय घेण्यात आला आहे. मराठा समाजातील तरूणांना उद्योगासाठी आण्णासाहेब पाटील आर्थिक मागास विकास महामंडळाकडून १० लाखापर्यंतचे बिनव्याजी कर्ज देण्यात येते. या मंडळासाठी निधी देण्याचे आदेश सरकारने दिले आहेत. त्यासंदर्भातील जीआर प्रसिद्ध करण्यात आला आहे. (Annasaheb Patil Economic Backward Development Corporation fund)

सरकारने प्रसिद्ध केलेल्या या जीआरनुसार आण्णासाहेब पाटील आर्थिक मागास विकास महामंडळाला ३० कोटींचा निधी देण्याची घोषणा सरकारने केली आहे. हा निधी लवकर वाटप करण्याचे निर्देश मुख्यमंत्र्यांनी दिले आहेत. यासंदर्भात मराठा समन्वयाकांची निधी मिळण्यासाठी मागणी सरकारकडे केली होती. या मागणीची दखल घेत सरकारने हा निर्णय घेतला आहे.

मुख्यमंत्र्यांच्या सूचनेनुसार सामान्य प्रशासन विभागाने हे आदेश वित्त विभागाच्या माध्यमातून काढले असून हा निधी वाटप होण्याची प्रक्रिया सुरू झाली आहे. यापूर्वी आण्णासाहेब पाटील आर्थिक मागास विकास महामंडळाला निधी मिळत नसल्यामुळे मराठा समाजाकडून तक्रारी केल्या जात होत्या. त्यानंतर सरकारने हा निर्णय घेतल्यामुळे मराठा समाजातील तरूणांना चांगला फायदा होणार आहे.

काय आहे आण्णासाहेब पाटील आर्थिक मागास विकास महामंडळाची योजना?

आण्णासाहेब पाटील आर्थिक मागास विकास महामंडळाकडून मराठा समाजातील तरूणांना उद्योग करण्यासाठी १० लाखांपर्यंतचे बिनव्याजी कर्ज दिले जाते. मराठा आरक्षणासंदर्भात मोर्चे काढले जात होते तेव्हा सरकारने हा निर्णय मराठा समाजातील तरूणांसाठी घेतला होता. यासंदर्भात आपण आपल्या घराजवळ असलेल्या स्थानिक सरकारी बँकेत चौकशी करू शकता.