मुंबई - विधानसभेने संमत केल्याप्रमाणे यंदाच्या शैक्षणिक वर्षापासूनच पदव्युत्तर वैद्यकीय प्रवेशासाठी मराठा आरक्षण लागू करण्याबाबतचे विधेयक शक्रवारी विधान परिषदेत एकमताने मंजूर करण्यात आले. त्यामुळे प्रवेशाचा मार्ग मोकळा झाला आहे.

राज्य सरकारने 30 नोव्हेंबर 2018 रोजी राज्यात मराठा समाजाला आरक्षण देणारा कायदा लागू केला. एसईबीसी अंतर्गत शैक्षणिक संस्था आणि नोकरीत 16 टक्के आरक्षण लागू करण्यात आले. मात्र, कायदा अस्तित्वात येण्यापबर्वीच पदव्युत्तर अभ्यासक्रमाची प्रवेश प्रक्रिया सुरू झाल्याचा ठपका ठेवत यंदा आरक्षणाचा लाभ देण्यास न्यायालयाने मनाई केली होती. त्यामुळे सरकारने विद्यार्थ्यांना दिलासा देण्यासाठी आणि त्यांचे प्रवेश कायम राखण्यासाठी अध्यादेश आणला होता. राज्य सरकारने या अध्यादेशाचे विधेयकात रूपांतर करून ते गुरुवारी विधानसभेत मांडले होते. तेथे हे विधेयक एकमताने मंजूर करण्यात आले. विधान परिषदेतही हे विधेयक शुक्रवारी एकमताने मंजूर करण्यात आले.