मुंबई : मराठी भाषेला अभिजात दर्जा मिळावा, यासाठी केंद्र सरकारकडे सातत्याने पाठपुरावा सुरू आहे. त्याअनुषंगाने सुरू केलेल्या जनअभियानाच्या माध्यमातून राष्ट्रपती रामनाथ कोविंद यांच्याकडे याचिका पाठवण्यात येणार आहेत. तसेच केंद्रीय सांस्कृतिक राज्यमंत्री अर्जुन राम मेघवाल यांच्याकडे राज्यातील मान्यवरांच्या स्वाक्षरीचे पत्र देणार असल्याचे मराठी भाषा मंत्री सुभाष देसाई यांनी सांगितले.

तसेच २७ फेब्रुवारी २०२२ रोजी मराठी भाषा गौरव दिनी मराठीला अभिजात दर्जाची घोषणा करावी, अशी विनंती करणार असल्याचे देसाई म्हणाले.

मराठीला अभिजात दर्जा मिळावा, या मागणीसाठी राज्यभरातील मान्यवर एकटवले आहेत. मान्यवरांच्या स्वाक्षरीमुळे राज्य सरकारच्या पत्राची परिणामकारकता वाढणार असल्याचेही देसाईंनी सांगितले.