MCA Election: बीसीसीआय अध्यक्षपदाची निवडणूक झाल्यानंतर सर्वांचे लक्ष मुंबई क्रिकेट असोसिएशनच्या निवडणुकीवर लागले आहे. राष्ट्रवादी काँग्रेसचे अध्यक्ष शरद पवार आणि भाजप नेते आशिष शेलार यांच्या पॅनलने हातमिळवणी केल्याने राजकीय दृष्ट्या या निवडणुकीकडे एका वेगळ्या नजरेने पाहिले जात आहे.

दरम्यान, आज (दि. 19) शरद पवार-आशिष शेलार यांच्या पॅनलचा प्रचार करण्यासाठी खुद्द मुख्यमंत्री एकनाथ शिंदे आणि उपमुख्यमंत्री देवेंद्र फडवणीस यांनी बैठक घेतली. यावेळी शरद पवार, एकनाथ शिंदे आणि देवेद्र फडणवीस हे महाराष्ट्रातील दिग्गज नेते एकाच व्यासपीठावर बसल्याचे दिसून आले.

जाहीर कार्यक्रम संपल्यानंतर उपमुख्यमंत्री देवेंद्र फडणवीस आणि विरोधी पक्ष नेते अजितदादा पवार यांनी एकमेकांशी गरवारे क्लबमध्ये चर्चा केली. ही चर्चा मते मिळवणे आणि फडणवीस यांचे निकटवर्तीय असलेल्या अमोल काळे यांच्या अध्यक्षपदाच्या निवडणुकीतील विजयाबद्दल होती की अन्य विषयावर याबाबत कमालीची उत्सुकता आहे.

दुसरीकडे एमसीए निवडणुकीतले उमेदवार आणि शिवसेनेचे सचिव मिलिंद नार्वेकर यांनी राष्ट्रवादी कॉंग्रेसचे अध्यक्ष शरद पवार यांना निरोप देण्यासाठी त्यांच्या वाहनापर्यंत गेले .मग पवारसाहेबांनी त्यांना गाडीत बसवले. प्रवासादरम्यान या दोघांची काय चर्चा झाली याबद्दल प्रचंड कुतुहल आहे. नार्वेकरांना जिंकण्यासाठी काय काय करायला हवे याची माहिती पवारसाहेबांनी दिल्याची चर्चा आहे.