Tribal Development Dept Bharti: राज्य शासनाने विविध विभागांतर्गत ७५ हजार कर्मचाऱ्यांची भरती करण्याची घोषणा केली असून, त्यातंर्गत आदिवासी विकास विभागात मेगा भरती होत आहे.

आदिवासी विकास विभागाकडून विविध १९ संवर्गातील ६०२ पदांसाठी मेगा भरती होत आहे. त्यासाठी १३ डिसेंबरपर्यंत ऑनलाइन अर्ज मागविण्यात आले आहेत. (Mega bharti in Tribal Development Department nashik news)

वरिष्ठ लिपिक/सांख्यिकी सहाय्यकाची सर्वाधिक १८७ पदे असणार आहेत. पात्र व इच्छुक उमेदवारांना https://tribal.maharashtra.gov.in या अधिकृत संकेतस्थळावर अर्ज करता येणार आहे.

राज्यात आदिवासी विकास विभागाचे चार अपर आयुक्तालय असून, त्या माध्यमातून दैनंदिन कामकाज केले जाते. सरळेसेवा भरती-२०२३ अंतर्गत आयुक्तालयात १६, नाशिक अपर आयुक्तालयात १६६, ठाणे अपर आयुक्तालयात १४५, अमरावती अपर आयुक्तालयात ८३, तर नागपूर आयुक्तालयात १९२ पदे भरण्यात येणार आहेत. ऑनलाइन अर्जास गुरुवार (ता. २२)पासून प्रारंभ झाला आहे.

विविध संवर्गातील पदांच्या भरतीसाठी महाराष्ट्रातील निश्चित केलेल्या परीक्षा केंद्रांवर ऑनलाइन परीक्षा होणार आहे.

परीक्षेचे स्वतंत्र वेळापत्रक संकेतस्थळावर जाहीर करण्यात येईल. संवर्गनिहाय पदसंख्या, अटी-शर्ती, परीक्षा शुल्क तसेच अर्ज भरण्याच्या मार्गदर्शक सूचनांसह इतर माहितीसाठी उमेदवारांनी संकेतस्थळाला भेट देण्याचे आवाहन आदिवासी विकास विभागाने केले आहे.

पदनिहाय संख्या

उच्च श्रेणी लघुलेखक (३), निम्न श्रेणी लघुलेख (१३), वरिष्ठ आदिवासी विकास निरीक्षक (१४), संशोधन सहाय्यक (१७), उपलेखापाल/मुख्य लिपिक (४१), वरिष्ठ लिपिक/सांख्यिकी सहाय्यक (१८७), लघुटंकलेक (५), गृहपाल (पुरुष) (४३), गृहपाल (स्त्री) (२५), अधीक्षक (पुरुष) २६, अधीक्षक (महिला) ४८, ग्रंथपाल ३८ प्रयोगशाळा सहायक (२९), आदिवासी विकास निरीक्षक (८), सहाय्यक ग्रंथपाल (१), प्राथमिक शिक्षणसेवक (मराठी) २७, माध्यमिक शिक्षणसेवक (मराठी) १५, उच्च माध्यमिक शिक्षणसेवक (१४), प्राथमिक शिक्षणसेवक (इंग्रजी) ४८.