मुंबईः शिवसेना आमदार अपात्रतेच्या निकालाचं वाचन विधानसभा अध्यक्ष राहुल नार्वेकर करत आहेत. खरी शिवसेना एकनाथ शिंदे यांचीच असल्याचं त्यांनी निकालातून स्पष्ट केलं. तर शिवसेनेचे प्रतोद भरत गोगावले यांची निवड वैध असल्याचं त्यांनी स्पष्ट केलं.

निकाल वाचनावेळी नार्वेकर म्हणाले, २१ जून २०२२ रोजी विधीमंडळ सचिवालयाकडे असलेल्या नोंदीनुसार शिंदे गटाकडे बहुमत दिसत आहे. त्यामुळे शिंदे गट हाच खरा शिवसेना पक्ष असल्याचं स्पष्ट होतंय.

''भरत गोगावले यांची नियुक्ती योग्य आहे. २१ आणि २३ जून २०२२ रोजीचे शिंदे गटाची पत्रे विधिमंडळ सचिवालयात आहेत. या दिवशी शिंदे गट हाच खरा शिवसेना पक्ष असल्याचं झालं. एकनाथ शिंदे यांची गटनेते पदी झालेली नियुक्तीही वैध आहे.'' असं नार्वेकरांनी स्पष्ट सांगितलं.

आमदार अपात्रता प्रकरणाच्या निकालाचे वाचन १० जानेवारी २०२४ रोजी दुपारी ४.३० मिनिटांनी सुरुवात होईल, असं सांगण्यात आलं होतं. मात्र या अपेक्षित वेळेपेक्षा ४५ मनिटे उशिरा नार्वेकर सेन्ट्रल हॉलमध्ये दाखल झाले. त्यानंतर एक तासाहून अधिक काळ निकाल वाचल्यानंतर विधानसभा अध्यक्ष राहुल नार्वेकर यांनी निकाल जाहीर केला.

दरम्यान, शिंद गट हाच खरा शिवसेना पक्ष असल्याचं नार्वेकरांनी निकालामध्ये सांगितलं. त्याला पुष्टी देताना म्हटलं की, शिवसेनेची २०१८ ची घटनादुरुस्ती मान्य करता येत नाही. ती नियमांना धरुन नाही. राष्ट्रीय कार्यकारिणीचं मत महत्त्वाचं होतं. त्यामुळे निवडणूक आयोगाकडून पक्षाची मूळ घटना आम्ही मागवून घेतली. त्यामधील तरतुदीनुसार एकनाथ शिंदेंचा गट मूळ पक्ष ठरत आहे.

नार्वेकरांच्या निकालातील ठळक मुद्दे...

• संपर्काच्या बाहेर गेले, केवळ याच कारणास्तव आमदारांना अपात्र ठरविता येणार नाही.

• ठाकरे गटाचे मिलिंद नार्वेकर, रविंद्र फाटक यांनी सुरतेत एकनाथ शिंदे यांची भेट घेतली हेही सिद्ध झाले.

• सत्तांतराच्या काळात खरा पक्ष हा शिंदेंचा हे सिद्ध झाल्याने २१ जून २०२२ च्या शिवसेना विधिमंडळ पक्षाच्या बैठकीतील गैरहजरीच्या मुद्दयावर अपात्रता ठरविता येणार नाही.

• बैठकीला अनुपस्थित राहणे हे अपात्रतेचे कारण ठरू शकत नाही. विधीमंडळ अधिवेशनास अनुपस्थिती हे कारण अपात्रतेचे कारण ठरु शकते.

• २१ जून २०२१च्या बैठकीच्या हजेरीपत्रकाची मुळ प्रत व सादर केलेली प्रत यांमधील तफावत; यांमुळे हा पुरावा ग्राह्य धरता येणार नाही