काँग्रेस आमदार चंद्रकांत जाधव (Chandrakant jadhav) यांचे हैदराबाद इथं निधन झाले. गेल्या काही दिवसांपासून ते आजारी होते. त्यांच्या अकाली निधनानं राजकीय वर्तुळातील नेत्यांनी सोशल मिडीयाद्वारे श्रद्धांजली वाहिली आहे. दरम्यान विरोधी पक्षनेते देवेंद्र फडणवीस यांनीही ट्विटद्वारे भावनिक पोस्ट शेअर केली आहे. 'कोल्हापूर उत्तर'चे आमदार चंद्रकांत जाधव जी यांच्या निधनाचे वृत्त अतिशय धक्कादायक आहे. एक अभ्यासू लोकप्रतिनिधी आपण गमावला आहे. मी त्यांना भावपूर्ण श्रद्धांजली अर्पण करतो आणि हे दुःख सहन करण्याची शक्ती त्यांच्या कुटुंबियांना मिळो, अशी ईश्वरचरणी प्रार्थना करतो.

दरम्यान, आमदार जाधव यांच्या निधनाने धक्का बसला अशी प्रतिक्रीया पालकमंत्री सतेज पाटील यांनी दिली आहे. तसेच आमदार चंद्रकांत जाधव निधनाची बातमी धक्कादायक आहे. परमेश्वर त्यांच्या कुंटुंबियांना यातून सावरण्याची ताकद देवो. त्यांचे अवेळी जाणे धक्कादायक आहे, अशी प्रतिक्रीया शिवसेनेचे नेते राजेश क्षीरसागर यांनी दिली आहे.

आमदार जाधव यांचे पार्थिव कोल्हापुरातील गोकुळ शिरगाव येथील कारखान्यात आले आहे. तेथून ते काँग्रेस कमिटीमध्ये अंत्यदर्शनासाठी ठेवण्यात आल्यानंतर जिल्ह्याचे पालकमंत्री सतेज पाटील, नियोजन मंडळाचे कार्याध्यक्ष राजेश क्षीरसागर, खासदार संजय मंडलिक आदींनी अंत्यदर्शन घेतले आहे.