Ajit Pawar Update : राज्यात सध्या विधघानसभेचे विधीमंडळाचे पावसाळी अधिवेशन सुरू आहे. मात्र राष्ट्रवादीचे नेते अजित पवार हे बंड करून सत्तेत सामील झाल्यानंतर विधानसभेतील विरोधीपक्ष नेतेपद रिक्त आहे. यावरून महाराष्ट्र नवनिर्माण सेनेचे अध्यक्ष राज ठाकरे यांनी भाष्य केलं आहे. त्यांनी अजित पवार आणि भाजपच्या युतीवर देखील यावेळी जोरदार टीका केली आहे.

राज ठाकरे यांना सध्या विरोधीपक्ष नेता नाहीये याबद्दल विचारले असता, त्यांनी आधी विरोधीपक्ष पहिलं सांगा? असा प्रतिप्रश्न केला. राज्यात सध्या विरोधीपक्षच दिसत नसल्याचे अधोरेखित करत ते म्हणाले की, सध्या आमचा एकच पक्ष विरोधीपक्ष दिसतोय, बाकी सगळ्यांचेच एकमेकांशी लागेबांधे आहेत.

अजित पवार यांचा शपथविधी झाल्यानंतर पहिल्या तासात मी ट्वीट केलं होतं की राष्ट्रवादीची पहिली टीम रवाना झाली म्हणून, सगळं तसच होतंय. आजही होर्डिंग लागले आहेत, त्यावर अजित पवार आणि शरद पवार यांचे एकत्र फोटो आहेत, असे राज ठाकरे म्हणाले. पवारांचं राजकारण मी खूप वर्षांपासून बघतोय, ही सगळी मिलीभगत आहे, असेही राज ठाकरे म्हणाले.

राज्यात रस्त्यांची ढासळलेली स्थितीवर बोलताना राज ठाकरे पुढे म्हणाले की, सगळ्या गोष्टी भोगून परत त्यांनाच मतदान केल्यानं ही शेफारलेली माणसं आहेत. काहीही केलं तरी लोक आम्हालाच मतदान करणार हा विश्वास त्यांना दिल्यानंतर तुम्हाला असेच रस्ते, प्रशासन मिळणार.

हे सांगणार की ७० हजार कोटींचा घोटाळा केला आणि आम्ही यांना जेलमध्ये टाकणार, नंतर तुम्ही त्यांच्यासोबत युती करणार. लोक परत यांनाच मतदान करणार. त्यामुळे जसं समाज असतो तसंच सरकार लोकांना मिळतं असेही राज ठाकरे यावेळी म्हणाले.