मुंबईः राज्याचं पावसाळी अधिवेशन आजपासून सुरु झालेलं आहे. या अधिवेशनात राज्यात कॅसिनो सुरु करण्याबाबत पावलं उचलण्यात येणार असल्याच्या चर्चा सुरु झालेल्या आहेत. परंतु कॅसिनोचा विषय संपण्यासाठीय नवीन विधेयक येत असल्याचं कळतंय.

पावसाळी अधिवेशनात एकूण २४ विधेयके आणि ६ अध्यादेश मांडले जाणार आहेत. यामध्ये महाराष्ट्र 'कॅसिनो' नियंत्रण व कर सुधारणा विधेयकाचा समावेश असल्याच्या बातम्या येत होत्या. परंतु कॅसिनोला उपमुख्यमंत्री देवेंद्र फडणवीसांनी पूर्वीच विरोध केलेला आहे.

1976 पासून हे विधेयक अस्तित्त्वात असून कॅसिनो हा विषय कायमचा संपविण्यासाठी हे नवीन विधेयक आणण्यात येणार असल्याचं सूत्रांनी सांगितलं. महाराष्ट्रात कॅसिनोची घाण नकोच, अशी सुस्पष्ट भूमिका उपमुख्यमंत्री देवेंद्र फडणवीस यांनी घेतली आणि त्यानुषंगाने हे विधेयक आणण्यात येत असल्याची माहिती सूत्रांनी 'साम टीव्ही'ला दिली आहे.

1976 पासून हा कायदा अस्तित्त्वात असल्याने कॅसिनो सुरु करण्यास इच्छूक लोक वारंवार न्यायालयात जातात आणि कॅसिनो सुरु करण्याची परवानगी मागतात. महाराष्ट्रात कुठल्याही स्थितीत कॅसिनो सुरु होऊ नयेत, अशी स्पष्ट भूमिका देवेंद्र फडणवीस यांनी मुख्यमंत्री असताना आणि आता उपमुख्यमंत्री असताना घेतली असल्याची माहिती आहे.

त्यामुळे हा कायदाच खारीज करण्याचे निर्देश गृहमंत्री आणि उपमुख्यमंत्री देवेंद्र फडणवीस यांनी दिले आणि त्यानुसारच, हे विधेयक आणण्यात आल्याची सूत्रांची माहिती आहे.