राज्यात मान्सून दाखल होण्याआधी अनेक जिल्ह्यात पावसाने हजेरी लावली आहे. दरम्यान, IMD ने मान्सूनबाबत पुन्हा शक्यता वर्तवली आहे. मान्सून काल (रविवारी) केरळमध्ये दाखल होणार होता. मात्र, त्याची सुरुवात झाली नाही. भारतीय हवामान विभागाकडुन आता मान्सून आणखी तीन ते चार दिवस उशीरा दाखल होण्याची शक्यता वर्तवण्यात आली आहे. नैऋत्य मान्सून साधारणपणे 1 जून रोजी केरळमध्ये दाखल होतो.

पंरतु अजुनही केरळमध्ये मान्सून दाखल झालेला नाही. त्यामुळे महाराष्ट्रातही मान्सून लांबला आहे. हवामान विभागाने दिलेल्या माहितीनुसार, दक्षिण-पश्चिम मान्सून आता लक्षद्विपपर्यंत पोहोचला असुन केरळमध्ये मान्सून तीन ते चार दिवस उशिराने येण्याची शक्यता आहे. त्यामुळे आणखी काही दिवस उष्णता असणार आहे.

भारतीय हवामान विभागाने दिलेल्या माहीतीनुसार, 'मे महिन्याच्या शेवटचे १५ दिवस ते 4 जूनपर्यंत मान्सून केरळमध्ये पोहोचेल. पण केरळमध्ये मान्सून दाखल होण्याचा अंदाज चुकला आहे.

हवामान विभागाने रविवारी दिलेल्या एका निवेदनात, 'दक्षिण अरबी समुद्रावरील पश्चिमेकडील वाऱ्यांच्या वाढीमुळे परिस्थिती अनुकूल होत असून पश्चिमेकडील वाऱ्यांची खोली हळूहळू वाढत आहे. 4 जून रोजी पश्चिमेकडील वाऱ्यांची खोली सरासरी समुद्रसपाटीपासून 2.1 किलोमीटरपर्यंत पोहोचली आहे. आग्नेय अरबी समुद्रावरील ढगांचे प्रमाणही वाढत आहे. पुढील तीन-चार दिवसांत केरळमध्ये मान्सून सुरू होण्यास अनुकूल परिस्थिती निर्माण होईल अशी अपेक्षा आहे, यावर सातत्याने लक्ष ठेवले जात असून आज सोमवारी पुढील अपडेट्स दिले जातील असं म्हंटलं आहे.