नाशिक : पावसाने बऱ्याच भागात उघडीप दिल्याने गेल्यावर्षीच्या तुलनेत आजअखेर ३३.८ टक्के कमी पर्जन्यमानाची नोंद झाली आहे. नाशिक आणि पुणे या विभागांतील पावसाच्या हजेरीची प्रतीक्षा कायम असून नगर, सातारा, सांगली जिल्ह्यांतील टंचाईमध्ये वाढ झाली आहे.

मागील आठवड्याच्या तुलनेत आता टंचाईग्रस्त २७ गावांची संख्या कमी झाली असून, तहान भागत नसलेल्यांमध्ये ७८ वाड्यांची भर पडली आहे. राज्यात गेल्यावर्षी ऑगस्टच्या मध्याला १२३.४ टक्के पाऊस झाला होता. यंदा आतापर्यंत ८९.६ टक्के पाऊस झाला आहे.

दरम्यान, राज्यातील ३२९ गावे आणि १ हजार २७३ वाड्यांना ३५१ टँकरद्वारे पाणीपुरवठा करण्यात येत आहे. मागील आठवड्याच्या तुलनेत, यवतमाळमधील १७ गावांचे १७, जळगाव जिल्ह्यातील १४ गावांचे १३ टँकर बंद करण्यात आले आहेत.

मात्र नगर जिल्ह्यातील २ गावे आणि ४ वाड्या, साताऱ्यातील २ गावे व ६४ वाड्या, सांगलीतील १ गाव आणि ८ वाड्यांना या आठवड्यात टँकरद्वारे अधिकचा पाणीपुरवठा करण्याची वेळ प्रशासनावर आली आहे. गेल्यावर्षी ऑगस्टच्या मध्याला नगर जिल्ह्यातील ९ गावे व १४ वाड्यांसाठी ७, तर सांगलीतील १० गावे व १४ वाड्यांना ८ टँकरद्वारे पाणीपुरवठा करण्यात येत होता.

पुणे विभागात सर्वाधिक टँकर

पुणे विभागातील १२६ गावे आणि ८६१ वाड्यांसाठी राज्यातील सर्वाधिक १३६ टँकर सुरू आहेत. त्याखालोखाल नाशिक विभागातील १४१ गावे आणि ३९० वाड्यांसाठी १२६ टँकरद्वारे पाणीपुरवठा करण्यात येत आहे.

विदर्भात वरुणराजा परतणार

गेल्या दहा-बारा दिवसांपासून दडी मारून बसलेला पाऊस पुन्हा परतण्याची शक्यता आहे. प्रादेशिक हवामान विभागाने गुरुवारनंतर नागपूरसह संपूर्ण विदर्भात पावसाची शक्यता वर्तविली आहे. त्यामुळे चिंताग्रस्त शेतकऱ्यांसह सर्वसामान्य नागरिकांनाही दिलासा मिळणार आहे. येत्या १९ व २० तारखेला गडचिरोली,

चंद्रपूर, गोंदिया आणि नागपूर या चार जिल्ह्यांमध्ये मुसळधार पावसाचा ‘यलो अलर्ट’ देण्यात आला आहे. इतरही जिल्ह्यांमध्ये तीन-चार दिवस हलका ते मध्यम स्वरूपाचा पाऊस अपेक्षित आहे.

दरम्यान, आगामी तीन दिवसांत मराठवाड्यातील काही जिल्ह्यांत मेघगर्जनेसह पावसाची शक्यता वर्तविण्यात आली आहे. यामध्ये १७ ऑगस्टला नांदेड, १८ ला हिंगोली, परभणी, जालना, छत्रपती संभाजीनगर, नांदेड तर १९ ऑगस्टला हिंगोली, परभणी, जालना, छत्रपती संभाजीनगर, नांदेड जिल्ह्यांच्या काही भागात वादळी वारा, मेघगर्जना, विजांच्या कडकडाटासह हलक्या ते मध्यम स्वरूपाच्या पावसाची शक्यता आहे.

जिल्हानिहाय टंचाईग्रस्त गावे आणि वाड्यांची संख्या (कंसात टँकरची संख्या)

जिल्हा - टंचाईग्रस्त गावे - वाड्या

पुणे -३८ -२७५ (३९)

सातारा ५६ -३४३ (६१)

सांगली --२३- १६९ (२७)

सोलापूर- ९ -७४ (९)

नाशिक -६६ -३८ (५६)

जिल्हा- टंचाईग्रस्त गावे -वाड्या

जळगाव -१३ -० (१५)

नगर -६२ -३५२ (५५)

औरंगाबाद -३०- ४ (४१)

जालना -२७ -१८ (४३)

बुलडाणा- ५- ० (५)