मुंबईः राष्ट्रवादी काँग्रेसचे खासदार अमोल कोल्हे यांनी काल पुस्तक दिनानिमित्त एक ट्विट केलं होते.त्यामध्ये त्यांनी दोन पुस्तकं वाचतानाचे फोटो शेअर केले होते. एक पुस्तक शरद पवारांचं 'नेमकचि बोलणे' आणि दुसरं 'द न्यू बीजीपी' हे पुस्तकं ते वाचत होते.

या पुस्तकानंतर पुन्हा त्यांच्या भाजप प्रवेशाच्या चर्चा सुरु झाल्या. त्याला आज कोल्हेंनी उत्तर दिलं आहे. ते म्हणाले की, मी पोस्ट केली की लगेच बातम्या सुरु झाल्या, नक्की अमोल कोल्हेंना सुचवायचं काय? असे प्रश्न विचारले जावू लागले. मला एवढंच सुचवायचं होतं विचारधारा कोणतीही असो, आधी तिचा अभ्यास करावा लागतो. तो अभ्यास वाचनातून, साहित्यातून होतो. जेव्हा त्यातून समाजमन सुसंस्कृत होतं तेव्हा राजकीय साक्षरता येते. त्यासाठी वाचन आवश्यक असल्याचं ते म्हणाले.

हेही वाचाः Fatty Liver Disease: संतुलित आहारातून रोखा फॅटी लिव्हरचा आजार

काल केलेल्या ट्विटमध्ये कोल्हेंनी नेमकचि बोलणे हे शरद पवारांच्या भाषणाचं पुस्तक आणि नलिन मेहता यांचं द न्यू बीजेपी हे पुस्तक वाचतांनाचे फोटो शेअर केले होते. या फोटोवर अमोल कोल्हे यांनी 'विचारधारा कोणतीही असो, ती समजून घेण्यासाठी पुस्तकांसारखा चांगला गुरु कोण. वाचाल तर वाचाल! जागतिक 'पुस्तक' दिनाच्या शुभेच्छा!!' अशा ओळी शेअर केल्या होत्या.

मागे काही महिन्यांपूर्वी अमोल कोल्हे यांनी केंद्रीय गृहमंत्री अमित शाह यांची भेट घेतली होती. शिवाय रावसाहेब दानवे यांच्याही भेटी घेतल्या होत्या. त्यामुळे ते भाजपच्या वाटेवर असल्याच्या चर्चा होत्या. कालच्या पोस्टने पुन्हा चर्चा सुरु झाल्या. मात्र आज त्यांनी त्याबद्दलचा खुलासा केलाय.