मुंबई - प्रजासत्ताक दिन पर्यटनस्थळी साजरा करण्याकडे कल वाढत असताना येत्या प्रजासत्ताकदिनी महाराष्ट्रातील सर्वात उंच शिखर असलेल्या कळसुबाई शिखरावर "एमटीडीसी' ध्वजवंदन करणार आहे. एमटीडीसीच्या वतीने प्रथमच असा उपक्रम हाती घेण्यात आला आहे.

साधारण 5 हजार 400 फूट उंच असलेल्या कळसुबाई शिखरावर दोन दिवसांच्या ट्रेकचे आयोजन करण्यात आले आहे. 25 जानेवारीला दुपारी 2 वाजता दादर व पुणे येथून या ट्रेकला सुरवात होईल. 26 जानेवारीला पहाटे सात वाजता ध्वजवंदन होईल. येथून ट्रेकरना भंडारदरा धरणाचे बॅकवॉटर; तसेच हरिहरगड, बहुला, अंजनेरी, घारगड, त्रिंगळवाडी आणि कावनाई या ठिकाणांचेही विहंगम दर्शन घडेल. पायथ्याच्या गावात जेवणाची सोय करण्यात येईल. अनुभवी ट्रेकिंग गाईडची मदत घेतली जाणार आहे. डीलक्‍स पॅकेजसाठी तीन हजार 917 आणि स्टॅण्डर्ड पॅकेजसाठी तीन हजार 557 रुपये घेतले जातील.