मुंबईः रेल्वेमध्ये फुकटात प्रवास करणारे महाभाग कमी नाहीत. शिवाय तिकीट नसतांना 'टीसी'शी वाद घालणारे अनेकजण असतात. त्यामुळेच आता सेंट्रल रेल्वेने एक मोठा निर्णय घेतला आहे.

सुरळीत आणि पारदर्शक तिकिट व्यवस्थापनासाठी आता टीसींकडे बॉडी कॅमेरे असणार आहेत. २४ रेल्वे स्थानकांवर असे कॅमेरे टीसींकडे असतील. पुढच्या आठवड्यापासून रेल्वे प्रशासनाने या निर्णयाची अंमलबजावणी करण्याचा निर्णय घेतला आहे.

'इंडियन एक्स्प्रेस'ने दिलेल्या वृत्तानुसार मुंबईतल्या छत्रपती शिवाजी महाराज टर्मिनस, भायखळा, दादर, कुर्ला, घाटकोपर, लोकमान्य टिळक टर्मिनस, ठाणे, डोंबिवली आणि कल्याण या स्थानकांसह २४ रेल्वे स्टेशन्समध्ये टीसींकडे बॉडी कॅमेरे असतील.

यासह हार्बर लाईनवरही बेलापूर, पनवेल, वडाळा, वाशी, नेरुळ, कोपरखैरने या स्थानकांमध्ये टीसींकडे बॉडी कॅमेरे असतील. त्यामुळे चोरीने प्रवास करणारे, हुज्जत घालणारे आणि इतर घटनांवर पायबंद घालण्यास मदत होणार आहे.

मे २०२३मध्येच सेंट्रल रेल्वेने ५० बॉडी कॅमेरे टीसींना पुरवण्यासंबंधी माहिती दिली होती. रेल्वेने संबंधित स्थानकांवर कॅमेरे पुरवले आहेत. या कॅमेऱ्यांवर 'तुम्ही कॅमेऱ्याच्या निगराणीखाली आहात' असं नमूद करण्यात आलेलं आहे. सदरील बॉडी कॅमेरे हे एचडी व्हीडिओ शूट करतील. शिवाय रात्रीदेखील क्लेअर व्हीडिओ शूट होईल. यामुळे गैरप्रकार टाळण्यास आणि उत्पादकता वाढण्यात मदत होणार असल्याचं रेल्वेकडून सांगण्यात आलं.