मुंबई - मुंबई-अहमदाबाद बुलेट ट्रेन प्रकल्पाचे काम दोन्ही राज्यात वेगात सुरू झाले आहे. गुजरातमधील स्थापत्य कामे वेगात सुरू असून आता दोन्ही राज्यातील जमीन अधिग्रहण ९९.९५ टक्के पूर्ण झाले असल्याची माहिती नॅशनल हायस्पीड रेल कॉर्पोरेशन लिमिटेडने दिली आहे.

एनएचआरसीएलने दिलेल्या माहितीनुसार, मुंबई-अहमदाबाद बुलेट ट्रेन प्रकल्पासाठी एकूण ९९.९५ टक्के भु संपादन पूर्ण झालं आहे. त्यापैकी गुजरातमध्ये १०० टक्के भूसंपादन झाले आहे. तर महाराष्ट्रात ९९.८३ टक्के भूसंपादन पूर्ण झाले आहे. प्रकल्पासाठी एकूण १३८९.४९ हेक्टर जमिनीची आवश्यकता आहे.

यापैकी गुजरात राज्यात ९५१.१४ हेक्टर, डहाणूमध्ये ७.९० हेक्टर तर महाराष्ट्रात ४२९.७१ हेक्टर जमिनीचे अधिग्रहण पूर्ण झाले आहे. उर्वरीत ०.२७ टक्के जमीन अधिग्रहणाबाबत प्रक्रिया सुरू असून लवकरच ही जमीन प्रकल्पासाठी मिळेल.

महाराष्ट्रातील ठाणे येथील डेपोच्या कामासाठी मोठ्या मशिनरी जाण्यासाठी लागणाऱ्या एका अप्रोच मार्गाची आवश्यकता आहे. या मार्गासाठी लागणाऱ्या जमिनीच्या अधिग्रहणाबाबत नोटिफिकेश जारी झाले असून लवकरच प्रक्रिया पूर्ण होईल, अशी माहिती एका वरिष्ठ अधिकाऱ्यांनी दिली.

दरम्यान, मुंबई-अहमदाबाद बुलेट ट्रेन प्रकल्पाची कामे प्रगती पथावर आहेत. मुंबईतील बांद्रा-कुर्ला कॉम्प्लेक्स येथील स्थानकाचे काम सुरू झाले आहे. तर या मार्गातील एकमेव भुयारी मार्गाचे काम मुंबईत बिकेसी येथे सुरू झाले आहे. नुकताच सर्वात मोठा स्टील ब्रिज उभारून प्रकल्पांचा महत्वाचा टप्पा पार झाला आहे. तर एका माऊंटन टनेलचे कामही पूर्ण झाले आहे.

भारतातील पहिला समूद्रातील बोगदा या मार्गासाठी बांधण्यात येणार आहे. बिकेसी ते शीळ फाटा दरम्यान ठाणे खाडीच्या मधून बांधण्यात येणार आहे.