मुंबई : छत्रपती शिवाजी महाराज आंतरराष्ट्रीय विमानतळावरील दोन्ही धावपट्ट्या पावसाळ्यानंतर नियोजित देखभाल दुरुस्तीसाठी उद्या (ता. १७) बंद ठेवण्याचा निर्णय विमानतळ प्रशासनाने घेतला आहे.

सकाळी ११ ते सायंकाळी पाच या वेळेत धावपट्टींची दुरुस्ती केली जाणार आहे. त्यामुळे सुमारे अंदाजित ५०० पेक्षा अधिक विमानसेवांना फटका बसणार आहे.

छत्रपती शिवाजी महाराज आंतरराष्ट्रीय विमानतळ देशातील सर्वांत व्यग्र विमानतळांपैकी एक आहे. येथून दररोज ९५० हून अधिक विमानांची ये-जा होते. दोन धावपट्ट्यांपैकी मुख्य धावपट्टीवरून तासाला ४६ विमानांची ये-जा होते; तर दुसऱ्या धावपट्टीवर तासाला ३५ विमानांची ये-जा होते.

पावसाळ्यानंतर विमानाचे आगमन आणि उड्डाणे सुरक्षित व्हावीत म्हणून दरवर्षी धावपट्टीची देखभाल दुरुस्ती करण्यात येते. यंदाही मुंबई विमानतळ प्रशासनाने १७ ऑक्टोबरला दोन्ही धावपट्ट्या आरडब्ल्यूवाय ०९/२७ आणि आरडब्ल्यूवाय १४/३२ तात्पुरत्या बंद ठेवण्यात येणार आहेत.

या संदर्भात सहा महिने आधी ‘नोटीस टू एअरमेन’देखील जारी करण्यात आल्याची माहिती विमानतळ प्रशासनाने दिली आहे.