मुंबईः लव जिहाद आणि धर्मांतरविरोधी कायदा राज्यासह देशभरात लागू करावा, या मागणीसाठी सकल हिंदू समाजाकडून शिवाजी पार्क येथे हिंदू जन आक्रोश मोर्चा काढण्यात आला होता.

या मोर्चावरुन ठाकरे गटाचे नेते संजय राऊत यांनी महत्त्वाचं विधान केलं आहे. शिवसेना आणि शिवसेना भवन हेच हिंदूंचं आशास्थान असल्याचं आज सिद्ध झालं, असं राऊत म्हणाले.

'आज सखल हिंदू समाजाचा मोर्चा निघाला. शिवसेना भवनासमोर त्याचं विसर्जन झालं. याचा अर्थ असाय की शिवसेना आणि शिवसेना भवन हिंदुंसाठी एकमेव आशास्थान आहे. बाकी हिंदू नेते आणि संघटना अपयशी आहेत.'

...तरीही आक्रोश मोर्चाची गरज पडतेय- राऊत

आठ वर्षांपासून शक्तिमान हिंदू नेत्यांचं देशात राज्य आहे. तरीही आक्रोश मोर्चा काढायची गरज पडू शकते, हे दुर्दैव आहे. शिवसेना भवनासमोर जमलेल्या सकल हिंदू समाजाने याविरोधात आक्रोश केल्याचं राऊत म्हणाले.

'भारत जोडो यात्रेला मोठा प्रतिसाद'

राहुल गांधींनी चार हजार किलोमीटरची पदयात्रा केली. भारत जोडण्याचा त्यांनी संकल्प केला. त्यांच्या यात्रेला मोठा प्रतिसाद मिळाला आहे. त्यांनी काश्मीरच्या चौकात तिरंगा फडकावून देशाला संदेश दिला आहे. युद्धापेक्षा प्रेमाने अनेक गोष्टी जिंकता येतात आणि देशाचं रक्षण करता येतं, हे राहुल गांधींनी सिद्ध केल्याचं संजय राऊत म्हणाले.