नेरळ : कर्जत एसटी कामगारांनी (karjat ST bus workers) संयुक्त कृती समितीच्या माध्यमातून विविध मागण्यांसाठी बेमुदत उपोषण (strike) सुरू केले होते. त्यामध्ये विविध कामगार संघटनांचे (workers union) बहुतांश एसटी कामगार यामध्ये सहभागी झाले होते; मात्र आता उपोषण स्थगित करून संयुक्त कृती समिती बरखास्त केली आणि संघटनांच्या पदाचे राजीनामे (resignation) देऊन प्रमुख मागणीसाठी (employee demands) कर्मचाऱ्यांनी बेमुदत संप सुरू केल्याने कर्जत आगारातून आज फक्त चार एसटी बस सुटल्या. त्यामुळे प्रवाशांची दुसऱ्या दिवशीही गैरसोय झाली. एका कर्मचाऱ्याने आत्महत्येचा प्रयत्न (suicide attempt) केला; परंतु अन्य कामगारांनी वेळीच त्याला अडवल्याने अनर्थ टळला.

एसटी कर्मचाऱ्यांच्या काही मागण्या पूर्ण झाल्या; परंतु राज्य सरकारमध्ये विलीनीकरण करण्याची प्रमुख मागणी मान्य न झाल्याने त्यांनी आपल्या पदांचे राजीनामे विविध संघटनांकडे पाठवून बेमुदत संपाचे हत्यार उचलले. याप्रसंगी पंढरीनाथ काकडे या चालक कर्मचाऱ्याने शेजारीच असलेल्या झाडाला फास घेऊन आत्महत्येचा प्रयत्न केला; परंतु तेथे उपस्थित अन्य कर्मचाऱ्यांनी त्याला अडवल्याने पुढील अनर्थ टळला.