मुंबई- नामदेव जाधव नावाची व्यक्ती स्वत:ला राजमाता जिजाऊ यांचे वंशज असल्याचा दावा करत आहे. याप्रकरणी राष्ट्रवादीचे आमदार रोहित पवार यांच्याकडे लेखी तक्रार करण्यात आली आहे. स्वराज्य संकल्पक महाराजा राजे लखोजीराव जाधव यांचे वंशज प्रा. राजे गोपाल भगवानराव जाधव यांनी रोहित पवारांना याप्रकरणी पत्र लिहिलं आहे.

रोहित पवारांनी हे पत्र सोशल मीडियावर शेअर केला आहे. स्वतःच्या फायद्यासाठी कुणी असं करत असेल तर हे चुकीचं असून याची चौकशी झाली पाहिजे, अशी मागणी पवारांनी केली आहे. ( namdev jadhav claiming ancestors rajmata jijau ncp leader rohit pawar got letter about investigation)

फेसबुकवर झालेल्या पोस्टमध्ये रोहित पवार म्हणालेत की, नामदेव जाधव नावाची व्यक्ती सध्या सोशल मीडियाच्या माध्यमातून स्वतःला राजमाता जिजाऊ माँ साहेब यांचे वंशज म्हणवून घेत आहे, मात्र त्यांचा राजे लखोजीराव जाधव आणि जिजाऊ माँ साहेब यांच्या घराण्याशी कोणताही संबंध नसून ती व्यक्ती केवळ प्रसिद्धीसाठी आदरणीय पवार साहेबांवर टीका करत आहे.

याबाबत चौकशी करून त्यांची तोतयेगिरी उघडकीस आणण्याची मागणी स्वराज्य संकल्पक महाराजा राजे लखोजीराव जाधव यांचे वंशज प्रा. राजे गोपाल भगवानराव जाधव यांनी केली. याबाबतचं पत्र त्यांनी दिलं.. . लोकांच्या माहितीसाठी हे पत्र मी शेअर करत आहे, असं रोहित पवार म्हणाले आहेत. (Latest Marathi News)